Dziýdodan 27-29 qazan kúnderi Birikken Arab ámirlikteriniń astanasy Abý-Dabide álemdik "Grand Slam" kezeńi ótedi. Álemniń 64 elinen 400-ge jýyq sportshy qatysatyn dodada qazaq dziýdoshylary da baq synaidy, dep habarlaidy Masssaget portaly.
Qazaqstan quramasy qyrkúiek aiynda Bakýde ótken álem chempionatyna qatysty. Erler arasynda 66 kg salmaq dárejesinde Erlan Serikjanov kúmis medal enshiledi. Áielder arasynda Galbadrah Otgontsetseg (-48 kg) qola júldeger atandy. Eki dziýdoshy da Abý-Dabidegi jarysqa qatysady. Galbadrah qyzdar arasynda elimizdiń atynan jalǵyz ózi barady.
Erler arasynda elimizdiń eń myqty dziýdoshylary jarys jolyna shyǵady. 60 kg salmaqta Rio Olimpiadasynyń kúmis júldegeri Eldos Smetov júldege talasady. Dziýdoshy Djakartada ótken Aziia oiyndary kezinde jaraqat alyp qalǵan edi. Nátijesinde álem chempionatyna qatysa almady. Sondai-aq Abý-Dabide bul salmaqta tanymal dziýdoshy Ǵusman Qyrǵyzbaev ta baq synaidy.
66 kg-ǵa deiingi salmaqta Erlan Serikjanovtan ózge Eldos Jumaqanov ta barady. -73 kg salmaqta Álemdik Gran Pri kezeńiniń qola júldegeri Bekádil Shaimerdenov altynǵa talasyp kórmek.
Abý-Dabi tatamiinde el namysyn qorǵaityn dziýdoshylar qatarynda Didar Hamza (-81 kg), Islam Bozbaev (-90 kg), Aziz Qalqamanuly (-90 kg), Ádilhan Qozybaev (-100 kg), Erasyl Qajybaev (+100 kg) jáne Ǵalymjan Qyryqbai (+100 kg) bar.
