Qazaqstannyń boksshy qyzdary «Ulttar kýbogi» halyqaralyq týrniriniń sýperkýbogin jeńip aldy. Boksshylarymyz eresekter, jasóspirimder jáne jastar arasynda jalpykomandalyq esepte birinshi oryndy ielendi, dep habarlaidy "Ult aqparat" QR Boks federatsiiasyna silteme jasap.
«Qańtardyń 16-20 kúnderi Serbiianyń Sombor qalasynda bokstan «Ulttar kýbogi» halyqaralyq týrniri ótip, oǵan álemniń 20 elinen 170-ten astam sportshy qatysty. Qazaqstan quramasy qatarynda jastar, jasóspirimder jáne eresekter komandasy boldy. Ulttyq qyzdar quramasy elge 11 medalmen, onyń ishinde 5 altyn, 1 kúmis jáne 5 qola medalmen oraldy», - dep atap ótedi federatsiia.
Taratylǵan málimetke qaraǵanda, 48 kelide sharshy alańǵa kóterilgen Alýa Balqybekova reseilik Iýliia Chýmgalakovadan basym tústi. Al Nazym Qyzaibai (51 keli) altyn úshin aiqasta Angelina Lýkasqa ese jiberdi. Dina Jolaman (54 keli) vengerlik Sabin Shýtssten basym tússe, Rimma Volosenko (60 keli) týrnirdiń úzdik boksshysy atandy. Ol aqtyq synda horvatiialyq Sara Beramnan basym tústi. Lázzat Kúngeibaeva da reseilik Aleksandra Dmitrievadan basym bolyp, altyn aldy.
Áliia Ábdiraiymova, Aqerke Baqytjan, Baian Aqbaeva, Aida Ondash jáne Móldir Bazarbaeva týrnirdiń qola júldegeri atandy.
Al jasóspirimder arasynda Jibek Jarasqyzy (66 keli), Aijaryq Sherihan (70) jáne Kseniia Dreval (+80 keli) týrnir chempiony atandy. Kúmis medal Symbat Áliasqar (46 keli), Gýlnar Turapbai (52), Valeriia Semenova (70) jáne Nazerke Serikke (57) buiyrsa, Talshyn Tosbai (60), Kamila Ahmet (52 ), Aidyn Temirjan (57) qola júldeger boldy.
Jastar arasynda Mariia Gladkova (57), Anel Sakish (51) jáne Anel Qudaibergen (48) chempiondyq ataq jeńip aldy. Kúmis medal Erkejan Dáýletjanqyzyna (57), Módir Toiyqovaǵa (54) jáne Uljanai Mamýtovaǵa (64) buiyrdy. 81 kelide Gúlsaia Erjan týrnirdiń qola júldegeri atandy.
