Saýda jáne integratsiia ministrliginiń alqa otyrysynda vitse-ministr Janel Kúshikova EAEO aiasynda keibir memleketter Qazaqstan aldyndaǵy mindettemelerin oryndamai otyrǵanyn málim etti, dep habarlaidy QazAqparat.
«Eýraziialyq ekonomikalyq odaqtyń ortaq naryǵynyń áleýetin tolyqqandy júzege asyrýǵa jekelegen faktorlar kedergi keltirip tur. Birinshiden, ózara saýdaǵa qoiylǵan kedergiler bar. Otandyq taýarlardyń eksporty eń aldymen Resei naryǵyna baǵyttalǵan. Sonymen birge reseilik naryqtaǵy qazaqstandyq biznestiń jandanýy - seriktesterdiń shekteý sharalaryn engizýine sebep bolyp otyr. Búgingi kúni dáleldengen 63 kederginiń 54-i joiyldy, onyń 25-i reseilik taraptan qoiylǵan. Onyń ózinde bul tizim tolyq emes», - dedi Janel Kúshikova Saýda jáne integratsiia ministrliginiń alqa otyrysynda.
Onyń aitýynsha, Úkimet osy kedergilerdiń bárin anyqtap, EEK alańynda olardyń kúshin joiý úshin qajetti sharalardy qabyldaýda.
«Máselen, ótken jyly qazaqstandyq biznes úshin eń jandy degen 8 kederginiń kúshi joiyldy. Olardyń jalpy somasy 100 million dollardy quraidy. Biznespen keri bailanysty jolǵa qoiý úshin Qoǵamdyq qabyldaý qyzmeti quryldy. Bizdiń biznestiń jumysyna kedergi keltiretin taǵy 8 kedergini alyp tastaý kerek», - dedi ol.
Janel Kúshikova sonymen qatar ekonomikalyq odaqta seriktes memleketterdiń keibiri ózine alǵan mindettemelerdi oryndamai jatqanyn atap ótti.
«EAEO týraly Kelisimniń negizgi erejeleri josparlanǵan ýaqyttan qalyp barady. Tipti jekelegen erejeler múlde shet qalǵan. Keibir kelisimderdiń kúshine ený merzimi uzaryp ketti. Memlekettik satyp alý salasyndaǵy ulttyq rejim tolyǵymen oryndalmaidy. EAEO-daǵy belgili seriktester aimaqtyq sertifikattaý túrinde qosymsha talaptardy belgilep qoiǵan. Bank kepildikteri men ESQ-ny taný tártibi múlde joq. EAEO-ǵa múshe memleketterdiń ishki shekaralarynda baqylaýdyń barlyq túriniń joiylǵanyna qaramastan, is júzinde baqylaýdyń jańa túrleri paida bola bastady. Osylaisha, Resei Federatsiiasynda veterinariialyq-sanitarlyq baqylaý degen shyqty. Al federaldy keden qyzmetiniń mobildi toptary is júzinde kedendik baqylaýdy júzege asyrady. EAEO-nyń aqparattyq integratsiialanǵan júiesi jumys isteýden qaldy. Jýyq arada osy máselelerdi kóteremiz», - dedi ol.
Janel Kúshikova úshinshiden ekonomikalyq odaqqa múshe memlekettermen kooperatsiia deńgeii múlde tómen ekenin alǵa tartty.
«Ókinishke qarai, EAEO-ǵa múshe memleketter bir-birine teń seriktes emes, básekeles retinde qaraidy. Osy baǵyttaǵy jumysty kúsheitý qajettigin Premer-Ministr 5 aqpandaǵy Eýraziialyq úkimetaralyq keńestiń otyrysy barysynda da atap ótti. Úshinshi eldermen saýda kelisimderiniń áleýetin barynsha arttyrýǵa múmkindik beretin yntymaqtastyqty jolǵa qoiý kerek dep sanaimyz», - dedi ol.
