Qazaqstan Respýblikasynyń Ulttyq banki men Ózbekstan Respýblikasynyń Ortalyq banki arasynda Banktik qadaǵalaý salasyndaǵy ózara is-qimyl týraly kelisimge qol qoiyldy, dep habarlaidy QazAqparat tilshisi.
«Búgin Qazaqstan Respýblikasynyń Ulttyq banki men Ózbekstan Respýblikasynyń Ortalyq banki arasynda Banktik qadaǵalaý salasyndaǵy ózara is-qimyl týraly kelisimge qol qoiyldy. Bul Ózbekstanda Qazaqstannyń enshiles bankterin ashýǵa múmkindik jasaidy», - dedi QR Ulttyq bankiniń tóraǵasy Daniiar Aqyshev.
Bank basshysy Halyk bank ózbek naryǵyna qyzyǵýshylyq tanytyp otyrǵanyn jetkizdi. Budan ózge bankter da kórshi elde bólimderin ashýǵa nietti ekenin jetkizdi.
Kelisimge sáikes Qazaqstan men Ózbekstan ulttyq zańnamalaryna sáikes eki memlekettiń bank sektoryna qatysty jańalyqtarmen, sondai-aq ulttyq zańnamada ruqsat etilgen shamada normativtik-quqyqtyq retteý, baqylaý men qadaǵalaý máseleleri jóninde aqparat almasý nysanyndaǵy yntymaqtastyqty júzege asyratyn bolady.
Atap aitqanda, Qazaqstan bankterine bas bankke arnalǵan teńgemen balamada keminde 100 mln eýro mólsherinde jáne transshekaralyq mekeme úshin 100 mlrd som mólsherinde jarǵylyq kapitalynyń bolýy, sondai-aq halyqaralyq shákil boiynsha shetel valiýtasymen Standard & Poor's reitingtik agenttiginiń «V»-dan nemese Fitch Ratings, Moody's bergen osyndai deńgeidegi reitingten tómen emes uzaq merzimdik kredittik reitingtiń bolýy jatatyn qajetti talaptarǵa sáikes kelgen jaǵdaida Ózbekstan Respýblikasynyń aýmaǵynda transshekaralyq mekeme qurýǵa nemese ielenýge múmkindik beriledi.
Qazaqstan Respýblikasynyń Ulttyq Banki men Ózbekstan Respýblikasynyń Ortalyq banki qol jetkizilgen kelisimdi oń baǵalap, qujattyń Ortalyq Aziianyń eki jetekshi ekonomikasynyń tatý kórshilik yntymaqtastyǵyn nyǵaitýǵa áser etetin bolady dep úmit bildirdi.
