Qazaqstan Ulttyq banki biylǵy 1 qazannan bastap qarjylyq qyzmetterdi qashyqtan alý úshin biometriialyq sáikestendirý servisin paidalanady, dep habarlaidy QazAqparat.
Bul servis «bet-álpetti taný» tehnologiiasy arqyly qarjylyq qyzmetti qashyqtan alý múmkindigin kózdeidi. Iaǵni qarjy uiymyna barýdyń qajeti joq. Klientterge bank shottary men depozitterdi ashý, tólem kartochkalaryn shyǵarý, kreditteý siiaqty qyzmet túrleri kórsetiledi.
«Qashyqtan biometriialyq sáikestendirýdi engizý álemdegi kúrdeli epidemiologiialyq jaǵdaidyń aiasynda jańa qaýip-qaterlerge jaýap beredi. Servisti qarjy qoǵamdastyǵynyń paidalanýy halyqqa qashyqtan kórsetý tásilimen usynylatyn qyzmetter tizimin keńeitedi», - dedi QR Ulttyq banki tóraǵasynyń orynbasary Esjan Birtanov.
Atap ótilgendei, atalmysh servis bankterge, saqtandyrý kompaniialaryna, baǵaly qaǵazdar naryǵynyń kásibi qatysýshylaryna, tólem jáne mikroqarjy uiymdaryna qoljetimdi.
«Servisti Ulttyq bank qarjy naryǵyna qatysýshylarmen birlesip ázirledi. Júie aǵymdaǵy jylǵy sáýirde pilottyq rejimdi iske qosyldy. Osy ýaqyt ishinde servis ekinshi deńgeidegi 11 bankke halyqqa 2,8 mln bank qyzmetin kórsetýge múmkindik berdi.
QR Ulttyq banki iske asyratyn qashyqtan sáikestendirý tetigi Qazaqstannyń qarjy sektoryn tsifrlandyrý jolyndaǵy taǵy bir qadam bolyp tabylady.
SDAO servisine qosylýǵa múddeli bolǵan jaǵdaida, qarjy naryǵyna qatysýshylar +7-7272-50-66-26 telefony boiynsha QBEO-ǵa ótinish bere alady», - delingen Ulttyq bank aqparatynda.
Júieniń operatory - Ulttyq Banktiń enshiles uiymy «Qazaqstan bankaralyq esep aiyrysý ortalyǵy» RMK.
