Qazaqstannyń birden 34 ýniversiteti britandyq QS EECA 2022 agenttiginiń nusqasy boiynsha úzdik joǵary oqý oryndarynyń tizimine endi, dep habarlaidy QazAqparat.
Reiting Eýropa men Orta Aziia elderiniń úzdik joǵary oqý oryndary týraly aqparatty qamtidy. TOP-100 quramyna 7 otandyq ýniversitet kirdi.
Kóshbasshy ál-Farabi atyndaǵy Qazaq ulttyq ýniversiteti boldy.
Ótken jylmen salystyrǵanda ýniversitet 3 pozitsiiaǵa joǵarylap, reitingte Ystanbul tehnikalyq ýniversiteti (Túrkiia), Vilniýs ýniversiteti (Litva) jáne basqa da sheteldik ýniversitetterdi basyp ozyp, 16-orynǵa ie boldy.
QazUÝ-dan keiin reitingte L. N. Gýmilev atyndaǵy Eýraziia ulttyq ýniversiteti kósh bastap tur.
Ol halyqaralyq reitingtte 42-shi ornynǵa jaiǵasty. Qazaqstandyq joǵary oqý oryndary arasynda Satbayev University úshinshi orynda tur.
Óńirlik joǵary oqý oryndary arasynda TOP-100 qataryna M. Áýezov atyndaǵy Ońtústik Qazaqstan ýniversiteti endi.
«QS Emerging Europe and Central Asia University Rankings reitingine kiretin qazaqstandyq joǵary oqý oryndarynyń sany jyl saiyn artyp keledi. Bul joǵary bilimniń álemdik arenada tanylýyn bildiredi. Eger ótken jyly reitingke 27 qazaqstandyq ýniversitet kirse, biyl 34 joǵary oqý oryny endi. Otandyq ýniversitetter Resei, Chehiia, Polsha, Estoniia, Litva, Túrkiia, Grýziia, Ázirbaijan jáne basqa elderdiń jetekshi ýniversitetterimen básekege túsýde. Bul bizdiń joǵary oqý oryndarynyń bilim berý sapasyn arttyrý boiynsha úlken jumys júrgizilgenin kórsetedi. Sondai -aq álemdik reitingtegi qazaqstandyq ýniversitetterdiń sanynyń artýy bizdiń joǵary oqý oryndarymyzdyń zaman talaptaryna jáne álemdik standarttarǵa sai bilim beretindigin kórsetedi», – dep atap ótti QR BǴM Joǵary jáne joǵary oqý ornynan keiingi bilim departamentiniń direktory Ádilet Toibaev.
Aita keteiik, QS EECA reitingin jasaý kezinde on negizgi kórsetkish eskeriledi.
Olardyń ishinde ýniversitetterdiń jumys berýshiler arasyndaǵy jáne akademiialyq bedeli, oqytýshylar men stýdentter sanynyń araqatynasy, bir oqytýshy men qyzmetkerge shaqqandaǵy jariialanymdar sany, joǵary oqý oryndarynyń ǵalymdarynan dáieksóz alý sany, sheteldik stýdentterdiń, oqytýshylar men qyzmetkerlerdiń úlesi jáne taǵy basqalary bar.
