Qazaqstandyq 20 joǵary oqý orny Prezidenttik olimpiada jeńimpazdaryna arnaiy bilim granttaryn bóldi, dep habarlaidy "Ult aqparat" BǴM baspasóz qyzmetine silteme jasap.
Olimpiadanyń respýblikalyq kezeńi jaratylystaný – matematikalyq baǵyttaǵy pánder boiynsha 15-18 qarasha aralyǵynda ótti. Ziiatkerlik saiystyń qorytyndysy boiynsha 48 oqýshy jeńimpaz jáne júldeger atandy. QR BǴM I dárejeli diplomdarymen — 11 oqýshy, II dárejeli diplomdarmen — 15 oqýshy jáne III dárejeli diplomdarmen 22 oqýshy marapattaldy.
«Bilim jáne ǵylym ministrligi Memleket basshysynyń tapsyrmasy boiynsha daryndy balalardy qoldaý boiynsha sharalar qabyldap jatyr. Qazaqstandyq 20 joǵary oqý orny Prezidenttik olimpiadanyń jeńimpazdary men júldegerlerin qoldaýǵa niet bildirip, olarǵa arnaiy granttar bóldi. Bul olimpiada ótkizý barysynda daryndy balalardy kótermeleý úshin qolǵa alynǵan alǵashqy teńdessiz shara. Mundai qoldaý daryndy balalardyń áleýetin iske asyrýǵa jáne elimizdiń adami kapitalyn damytýǵa qomaqty úles qosýǵa múmkindik beredi. Sondai-aq oqýshylar QR BǴM diplomdaryn, medaldar men qazaqstandyq joǵary oqý oryndarynda bilim alý sertifikattaryn aldy. Oqýshylarymyzdyń nátijeleri el ishindegi, tipti túrli halyqaralyq olimpiadalarda da jaqsaryp kele jatqanyn atap ótken jón», — dedi «Daryn» respýblikalyq ǵylymi-praktikalyq ortalyǵynyń direktory Timýr Nurkeshov.
Esterińizge sala keteiik, HIV Prezidenttik olimpiadanyń respýblikalyq kezeńi E.A. Bóketov atyndaǵy Qaraǵandy ýniversitetinde ótti. Ziiatkerlik baiqaýǵa elimizdiń barlyq óńirinen óńirlik jáne irikteý kezeńderiniń nátijesi boiynsha iriktelgen 182 oqýshy qatysty. Oqýshylarǵa tórt pán boiynsha tapsyrmalar berildi: matematika, fizika, himiia jáne biologiia.
Prezidenttik olimpiadaǵa qatysýshylardyń jumysyn Qazaqstannyń jetekshi joǵary oqý oryndarynyń mamandary, halyqaralyq olimpiadalarynyń jeńimpazdary men júldegerleri baǵalady. Barynsha ashyqtyqty qamtamasyz etý úshin konkýrs onlain kórsetildi.
Prezidenttik olimpiadanyń jeńimpazdary men júldegerlerine grant bergen 20 joǵary oqý ornynyń tizimi:
1. Akademik E. A. Bóketov atyndaǵy Qaraǵandy ýniversiteti
2. Sársen Amanjolov atyndaǵy Shyǵys Qazaqstan ýniversiteti
3. Sátbaev Ýniversiteti
4. Safi Ótebaev atyndaǵy Atyraý munai jáne gaz ýniversiteti
5. M. Áýezov atyndaǵy Ońtústik Qazaqstan ýniversiteti
6. H. Dosmuhamedov atyndaǵy Atyraý ýniversiteti
7. Rýdnyi indýstrialdyq institýty
8. Qorqyt Ata atyndaǵy Qyzylorda ýniversiteti
9. Q. Jubanov atyndaǵy Aqtóbe óńirlik ýniversiteti
10. Pavlodar pedagogikalyq ýniversiteti
11. Y. Altynsarin atyndaǵy Arqalyq pedagogikalyq institýty
12. Narhoz
13. Qazaqstan-Britan tehnikalyq ýniversiteti
14. M. S. Nárikbaev atyndaǵy KazGIýÝ ýniversiteti
15. Almaty Menedjment Ýniversiteti
16. Ońtústik Qazaqstan memlekettik pedagogikalyq ýniversiteti
17. Sh. Ýálihanov atyndaǵy Kókshetaý ýniversiteti
18. Mirjaqyp Dýlatov atyndaǵy Qostanai injenerlik-ekonomikalyq ýniversiteti
19. Kaspii qoǵamdyq ýniversiteti
20. Qoja Ahmet Iasaýi atyndaǵy Halyqaralyq qazaq-túrik ýniversiteti
