foto: Tengrinews.kz
QR Premer-Ministriniń orynbasary Eraly Toǵjanov Májilis ókilderiniń depýtattyq saýalyna bergen jaýabynda joǵary oqý oryndaryn jikteýdiń jańa modeli engiziletinin aitty, dep habarlaidy QazAqparat.
«Memleket basshysynyń QR Prezidenti janyndaǵy Ulttyq qoǵamdyq senim keńesiniń úshinshi otyrysynyń qorytyndysy boiynsha bergen tapsyrmasyna sáikes, akademiialyq jurtshylyqpen talqylaý qorytyndysy boiynsha joǵary oqý oryndaryn jikteýdiń modeli ázirlenip, akademiialyq qaýymnyń talqylaýynan ótti. Qujatty joǵary oqý oryndarynyń básekege qabilettiligin arttyrý jáne ońtailandyrý jónindegi keńes maquldady. Sonymen qatar, joǵary oqý oryndaryn jikteýdiń bul modeli «QR Bilim salasyndaǵy keibir zańnamalyq aktilerine ózgerister men tolyqtyrýlar engizý týraly» zań jobasynda qarastyrylǵan» dep jazdy Eraly Toǵjanov jaýabynda.
Joǵary oqý oryndary mynadai toptarǵa bólinedi:
birinshi top – halyqaralyq jáne ulttyq deńgeidegi JOO
ekinshi top – óńirlik deńgeidegi JOO,
úshinshi top – salalyq deńgeidegi JOO.
Qalǵan jańadan ashylǵan JOO-lar tórtinshi topqa jatady.
Sondai-aq, joǵary oqý oryndaryn toptar boiynsha jikteý bilim berý, ǵylymi qyzmet, internatsionaldandyrý nátijelerine, el, óńir jáne (nemese) sala ekonomikasyna qosqan úlesine negizdelmek.
Joǵardy atalǵan úsh topqa kiretin JOO bilim berý baǵdarlamalaryn akkredittep, olardyń kásibi standarttarǵa sáikestigin qamtamasyz etýi qajet.
Al ǵylymi qyzmettiń tabystylyǵy professorlyq-oqytýshylyq quramnyń dáieksózdilik deńgeiine, ǵylymi kollaboratsiiaǵa, ǵylymi jobalardy kommertsiialandyrýdan túsetin kiristerge, reitingtik jýrnaldardaǵy jariialanymdar sanyna bailanysty aiqyndalady.
