Foto: Time.kz
2021 jyldan beri Qazaqstanda kásipkerlik salasynda jańa retteý saiasaty kezeń-kezeńimen engizilip keledi. Onyń basty maqsaty – artyq talaptardy qysqartyp, bizneske túsetin júktemeni azaitý, dep habarlaidy Ult.kz.
2024 jyldyń sáýirinde qabyldanǵan zań aiasynda 10 myńnan astam artyq talap kúshin joidy. Nátijesinde bizneske qadaǵalaý júktemesi 2019 jylmen salystyrǵanda 58%-ǵa tómendedi. Jyl sońynda engizilgen «prokýrorlyq súzgi» mehanizmi endi kez kelgen tyiym nemese shekteý sharasyn tek prokýrordyń kelisimimen ǵana júzege asyrýǵa múmkindik beredi.
Kásipkerlerge litsenziia alý rásimi de jeńildetilmek. 2025 jyldyń sońyna deiin litsenziia men ruqsat alýdyń talaptary qaita qaralyp, rásimderi jedeldetiledi. Buǵan qosa, esep berý mindetteri qysqartylyp, 58 saladaǵy aqparattyq quraldardyń jartysyna jýyǵy ońtailandyryldy jáne avtomattandyryldy.
Mundai sharalardyń arqasynda 2024 jyly shaǵyn jáne orta biznes sýbektileriniń sany 96 myńǵa artyp, 2,1 millionnan asty. Ekonomikadaǵy ShOB úlesi 38,6%-ǵa jetti, al olardyń ónim shyǵarý kólemi 11%-ǵa ósip, 18,7 trln teńgeni qurady.
Prezident tapsyrmasyna sáikes, memleket biznesti qadaǵalaýdan qoldaý men seriktestikke kóbirek mán berip otyr. 2025 jyldyń 1 sáýirinde eGov Business mobildi qosymshasy jańartylyp, kásipkerlerge yńǵaily jańa servister usynyldy. Endi qosymsha arqyly kompaniiany tirkeý, salyq kúntizbesin qadaǵalaý, elektrondy sertifikattar alý jáne qujattarǵa tsifrlyq qol qoiý múmkin boldy.
