Qazaqstanda ýaqytsha júrgen Ózbekstan azamattary úshin ÓR Ólii Májilisi palatasyna depýtattardy sailaý rásiminde daýys berýdiń tártibi túsindirildi, dep habarlaidy "Ult aqparat".
2019 jylǵy 22 qarashadaǵy Ortalyq sailaý komissiiasy qaýlysyna sáikes, sheteldegi Ózbekstannyń diplomatiialyq ókildikteri men konsýldyq mekemeleri janynda sailaý ýchaskeleri quryldy. Atap aitqanda, bul sharalar biylǵy 22 jeltoqsanda shetelde ýaqytsha jáne turaqty turyp jatqan Ózbekstan azamattary úshin Ólii májilisi palatasyna depýtattardy sailaý boiynsha uiymdastyrylyp otyr.
Azamattar úshin barynsha qolaily jaǵdai jasaý maqsatynda Nur-Sultan qalasyndaǵy Ózbekstan Elshiligi 12-sinen 18 jeltoqsanǵa deiin Qazaqstan óńirlerine barýdy qamti otyryp, aldyn ala daýys berýdi uiymdastyrady.
12 jeltoqsan kúni Qazaqstannyń Qaraǵandy jáne Jambyl oblystarynyń aýmaǵynda ýaqytsha jáne turaqty turyp jatqan Ózbekstan azamattarynyń Ólii Májilisi palatasyna aldyn ala daýys berýi bastaldy.
Saǵat 16:00-degi jaǵdai boiynsha atalǵan óńirlerde Ózbekstannyń 404 azamaty daýys berdi.
13 jeltoqsanda aldyn ala daýys berý Túrkistanda Qoja Ahmet Iasaýi atyndaǵy Halyqaralyq qazaq-túrik ýniversiteti ǵimaratynda jergilikti ýaqytpen saǵat 09:00-den 13:00 aralyǵynda ótkizý josparlanyp otyr.
Sonymen qatar Elshilik ókilderi Qazaqstan aýmaǵynda ýaqytsha ári turaqty turyp jatqan barlyq Ózbekstan azamattaryn 22 jeltoqsanda Nur-Sultandaǵy ÓR Elshiligi ǵimaratyndaǵy daýys berý sharalaryna shaqyrdy.
