Senattyń jalpy otyrysynda depýtat Nurjan Nursipatov qos azamattyǵy bar qyzmetkerlerdi jumystan bosatýǵa qatysty usynystar aitty, dep habarlaidy "Ult aqparat".
«Memleket basshysy 2020 jylǵy Qazaqstan halqyna Joldaýynda memlekettik qyzmetshiler nemese kvazimemlekettik uiymdardyń basshylarynda qos azamattyq anyqtalǵan jaǵdaida, olardy atqaratyn qyzmetinen bosatý qajettigi týraly atap ótti. Atalǵan tapsyrmany oryndaýdyń quqyqtyq sharasy retinde ótken jyldyń sońynda Eńbek kodeksine jáne «Memlekettik qyzmet týraly» Zańyna túzetýler engizildi», - dedi senator Ishki ister ministrligi men Memlekettik qyzmet isteri agenttigine joldaǵan depýtattyq saýalynda.
Oǵan sáikes memlekettik qyzmet Qazaqstan Respýblikasynyń azamattyǵyn joǵaltqan jaǵdaida ǵana emes, sondai-aq shet memlekettiń azamattyǵy anyqtalǵan kezde de toqtatylýǵa jatady. Al kvazimemlekettik sektor sýbektisiniń basshylary Qazaqstan Respýblikasynyń azamaty bola tura, shet memlekettiń azamattyǵy tabylǵan jaǵdaida eńbek sharty buzylady.
«Bizdińshe, qabyldanǵan sharalar odan ári júieli jáne dáiekti damýdy qajet etedi. Ótkeni memlekettik qyzmetshilerde qos azamattyǵy bar faktiler áli de anyqtalyp jatyr. Mysaly, quqyq qorǵaý qyzmeti týraly, áskeri qyzmet jáne áskeri qyzmetshilerdiń mártebesi týraly, arnaýly memlekettik organdary týraly salalyq zańdarda shet memlekettiń azamattyǵy qyzmetten shyǵarý úshin derbes negiz retinde qaralmaidy. Qyzmettiń erekshe túri bolyp sanalatyn joǵaryda atalǵan memlekettik organdar «Qazaqstan Respýblikasynyń Ulttyq qaýipsizdigi týraly» Zańnyń 9-babymen ulttyq qaýipsizdikti qamtamasyz etý kúshterine jatqyzylǵandyqtan, kórsetilgen talapty, iaǵni qyzmeten shyǵarý negizin engizýdi ǵana emes, sondai-aq aldyn alý sipatyndaǵy sharalardy qabyldaýdy qaraý usynylady.
Sonymen qatar, memlekettik qyzmettiń erekshe túrinde qyzmet etetin adamdardyń shet memlekette turýǵa yqtiiarhat alýyna tyiym salý máselesin qarastyrý usynylady», - dedi depýtat.
Osy oraida ol tek memlekettik qyzmetke qabyldaý kezinde ǵana emes, sonymen qatar jumys istep júrgen kezde de qyzmet sharttaryna sáikestigin anyqtaý úshin júrgiziletin arnaiy tekserýdi engizýdi qarastyrý kerektigin aitty. Bul turǵyda basqa azamattyqty alǵan adamnyń otandyq pasportty paidalanýy nemese sheteldik azamattyqty alý faktisi týraly habarlaý merzimderin buzǵany úshin ǵana kózdelgen ákimshilik jaýapkershilikke túzetý engizý talap etiledi.
«Qos azamattyq faktilerin anyqtaý máselelerine bailanysty halyqaralyq-quqyqtyq qujattar da ózektendirýdi qajet etedi», - dedi N. Nursipatov.
Osy oraida depýtat baiandalǵandy eskere kele, múddeli memlekettik organdarmen kelise otyryp tiisti aqparatty berýdi surady.
«Memleket basshysynyń joǵaryda kórsetilgen tapsyrmasyn jáne elimizdiń Negizgi Zańynyń 10-babynyń talaptaryn sapaly oryndaý baǵytynda qabyldanǵan sharalardyń tolyqtyǵy qamtamasyz etilgen be? Tiisti is-sharalardy zańnamalyq sipatta jetildirý qajettigi bar ma? Osy másele boiynsha qazirgi halyqaralyq-quqyqtyq negiz ulttyq múddelerge sáikes kele me nemese ony ózektilendirý ýaqyty keldi me?», - dep surady senator.
