UNESCO-nyń Qazaqstandaǵy «Adam jáne biosfera» baǵdarlamasynyń ulttyq rezervattar jelisi eki jańa rezervatpen tolyqty.
Ekologiia, geologiia jáne tabiǵi resýrstar ministrligi baspasóz qyzmetiniń málimetinshe, UNESCO-nyń «Adam jáne biosfera» baǵdarlamasynyń (MAV) Halyqaralyq úilestirý keńesiniń 32-shi sessiiasynyń otyrysy 2020 jyldyń 27 jáne 28 qazanynda virtýaldy formatta ótti.
Kezdesýdi ótkizýdiń tańdalǵan formaty COVID-19 pandemiiasyna bailanysty jáne kezdesýge qatysýshylardyń qaýipsizdigin qamtamasyz etý maqsatynda túrli elderden tańdaldy.
Sessiiaǵa Qazaqstan atynan UNESCO-nyń «Adam jáne biosfera» baǵdarlamasynyń Qazaqstandyq ulttyq komitetiniń (MAV) músheleri Roman Iashenko men Viktoriia Ilina, sondai-aq Qazaqstan Respýblikasynyń Frantsýz Respýblikasyndaǵy Elshiliginiń qyzmetkeri Áliia Baisabaeva qatysty.
«Atalmysh baǵdarlamanyń Qazaqstandyq ulttyq komiteti karantin rejimine bailanysty barlyq qiyndyqqa qaramastan, UNESCO-nyń Dúniejúzilik biosferalyq rezervattar jelisine qosý úshin 2 nominatsiialyq dereknama daiyndady. Komitet músheleri Almaty jáne Batys Altai memlekettik tabiǵi qoryqtary ákimshiligi qyzmetkerleriniń úilesimdi jumysynyń arqasynda Qazaqstandaǵy UNESCO-nyń «Adam jáne biosfera» baǵdarlamasynyń biosferalyq rezervattarynyń ulttyq jelisi eki jańa biosferalyq rezervatpen tolyqtyryldy», delingen habarlamada.
Halyqaralyq deńgeide arnaiy saraptamalyq keńes qazaqstandyq komitet usynǵan qujattamanyń «Adam jáne biosfera» baǵdarlamasynyń talaptaryna sáikestigine baǵa berip, UNESCO-nyń Dúniejúzilik biosferalyq rezervattar jelisiniń biosferalyq rezervattary retinde Almaty jáne Batys Altai memlekettik tabiǵi qoryqtaryn maquldaý múmkindigi týraly sheshim qabyldady.
«Búgingi tańda UNESCO-nyń «Adam jáne biosfera» baǵdarlamasynyń biosferalyq rezervattarynyń Qazaqstandaǵy ulttyq jelisinde 12 rezervat tirkelgen. Bul Ortalyq Aziianyń basqa elderindegi biosferalyq rezervattar sanynan edáýir asyp túsedi. Osynshama biosferalyq rezervattyń tanylýy Qazaqstannyń biologiialyq ártúrliligin saqtaý máselelerine álemdik qoǵamdastyqtyń nazaryn aýdaratynyn jáne ony bolashaq urpaq úshin saqtaýǵa umtylatynyn aiǵaqtaidy», delingen habarlamada.
Dúniejúzilik biosferalyq rezervattar jelisine ártúrli elderdiń aýmaǵynda ornalasqan 24 biosferalyq rezervat qosyldy. Sonyń biri transshekaralyq qoryq. Qazir Dúniejúzilik rezervattar jelisine álemniń 129 eliniń aýmaǵynda ornalasqan 714 rezervat kiredi.
UNESCO baǵdarlamasy boiynsha jumys isteitin ulttyq komitettiń qyzmeti týraly tolyǵyraq mekemeniń saitynan bilýge bolady.
