QR Ishki ister ministrligi Qylmystyq-atqarý júiesi komitetiniń basshylary elimiz túrmelerinde jaily jaǵdai jasaý úshin qandai jumystar atqarylyp jatqanyn aityp berdi, dep habarlaidy QazAqparat tilshisi.
«Qazirgi tańda árbir koloniiada – otriadtarda shaihana bar. Barlyq koloniialarda tońazytqyshtar, mikrovolnovkalar, shainek deisiz be – bári barshylyq», - deidi QAJK tóraǵasy Darhan Qanatbekov IIM-de ótken baspasóz máslihatynda.
Al QAJK tóraǵasynyń birinshi orynbasary Teńizjan Jánibekov bolsa, Almaty oblysyndaǵy túrmede tirkelgen azaptaý oqiǵasyna qarap, barlyq túzeý mekemelerinde solai bolyp jatyr dep oilamaý kerektigin aitady.
«Jalpy, ondai jaǵdailardy boldyrmaý úshin jaqynda ministr óziniń orynbasarlaryn inspektsiialaýǵa jiberdi. Qazir biz jan-jaqty is-sharalardy júrgizemiz. Azaptaý oqiǵalary bolsa, sol mezette shara qabyldaimyz. Qazirgi tańda zańǵa ózgeris engizý baǵytynda kóptegen usynystar túsip jatyr. Biz búkil Qazaqstandaǵy túrme salasyndaǵy eń bilikti mamandardy jáne ÚEU múshelerin, halyqaralyq uiymdardyń múshelerin shaqyrtyp, usynystaryn suradyq. Sebebi, ózimizdiń jasap jatqan qyzmetimizde kem-ketik bar shyǵar. Sonyń barlyǵyn azamattyq qoǵammen jinaqtap, 200-ge jýyq usynys aldyq. Jumys toby quryldy. Mynadai jaittardy boldyrmaý úshin jan-jaqty is-sharalardy qoldanamyz», - dedi Teńizjan Jánibekov.
Eske sala ketsek, buǵan deiin QR IIM QAJK tóraǵasy Darhan Qanatbekov Qazaqstanda túrmedegi adamdardyń sany 100 myńnan 29 myńǵa azaiǵanyn málim etken bolatyn.
