«QazAvtoÓnerkásip» avtokólik salasyndaǵy kásiporyndar odaǵy 2020 jylǵy 1 shildedegi jaǵdai boiynsha kólik parkiniń qurylymy týraly málimetti jariialady, dep habarlaidy "Ult aqparat".
«Ákimshilik politsiia organdary málimetinshe, Qazaqstanda barlyq tiptegi 4 mln 382 myń kólik tirkeýge engizilgen. Jeńil ári jeńil kommertsiialyq avtomobil úlesine 3 mln 631 myń tehnika tiesili nemese 82,9 paiyz. Osydan keiingi orynda júk kóligi (417,6 myń; 9,5 paiyz), tirkeme jáne jartylai tirkemeler (206,2 myń; 4,7 paiyz), avtobýstar (69,9 myń; 1,6 paiyz) men mototehnika (56,5 myń; 1,3 paiyz) tur», - delingen taratylǵan málimette.
Jeńil avtokólik parkiniń qurylymynda eskirgen tehnikanyń basym ekeni baiqalýda. Avtoparktiń jartysyn paidalaný merzimi 20 jyldan asqan (1,82 mln; 50 paiyz) kólikter qamtyp otyr. Sonymen qatar, 11-den 20 jylǵa deiingi kólik sany 783,7 myń (21,6 paiyz), 8-den 10 jylǵa deiingiler – 286,1 myń (7,9 paiyz), 3-ten 7 jylǵa deiingiler – 585,1 myń (16,1 paiyz), al paidalaný merzimi eki jylǵa jetpegen kólik sany 160,8 myń (4,4 paiyz) boldy.
Qazaqstanda LADA brendin tańdaǵandar kóbirek, reseilik markanyń úlesi 19,6 paiyzǵa nemese 712,2 myń avtomobilge jetti. Osydan keiingi orynda 13,6 paiyz (493,4 myń kólik) úlespen Toyota tur. Sonymen qatar bul tizimde Volkswagen (7,8%; 283,3 myń kólik), Audi (5,8%; 211,5 myń), Mercedes-Benz (4,9%; 177,2 myń), GAZ (4,2%; 153,1 myń), Mitsubishi (4,1%; 150,3 myń), Nissan (4,1%; 148,6 myń), Hyundai (3,5%; 128,6 myń) bar.
QazAvtoÓnerkásip málimetine qaraǵanda, 2017 jyly elimizdiń 1 000 turǵynyna shaqqanda 211 jeńil kólik, 2018 jyly – 207, 2019 jyly 202 kólik tiesili bolǵan. 2020 jylǵy 1 shildedegi jaǵdai boiynsha bul kórsetkish 1000 adamǵa shaqqanda 194 avtomobil deńgeiine deiin tómendedi.
