Aqyly avtojoldarda janarmaiy taýsylǵan nemese avtokóligi buzylǵan júrgizýshilerge kómek tegin kórsetiledi, dep habarlady «QazAvtoJol» UK ókilderi Pavlodar oblysyndaǵy qoǵamdyq tyńdaýda.
Pavlodar oblysynyń Pavlodar, Ekibastuz, Aqsý, Aqqýly, Jelezin jáne Tereńkól aýdandarynda Nur-Sultan – Pavlodar, Pavlodar – RF (Omby) shekarasy, Pavlodar – Semei – Qalbataý ýchaskelerinde aqy alýdyń ashyq júiesin engizý máselesi boiynsha qoǵamdyq tyńdaý ótti, dep habarlaidy QazAqparat «QazAvtoJol» UK baspasóz qyzmetine silteme jasap.
Aldaǵy ýaqytta tyńdaý Shyǵys Qazaqstan oblysynda jalǵasady. «QazAvtoJol» Ulttyq kompaniiasynyń ókilderi Semei, Shar, Besqaraǵai jáne Jarma aýdandarynyń turǵyndarymen kezdesedi.
Olar óńir turǵyndaryna aqy alýdyń ashyq júiesiniń jumys printsipterin, tólem tásilderin, jeńildikter, jol boiyndaǵy servisti damytý jáne aqyly ýchaskelerde qaýipsizdikti qamtamasyz etý júielerin túsindiredi.
Olardyń aqparaty boiynsha, Pavlodar oblysynyń úsh aqyly ýchaskesinde pilottyq rejimde 10 baqylaý arkasy jumys isteidi. Sondai-aq klienttermen jumys isteitin 4 ortalyqty iske qosý josparlanýda. Pavlodar – Omby jáne Pavlodar – Semei – Qalbataý joldarynda jeńil kólikten tólem alynbaidy.
Sondai-aq, rekonstrýktsiialaý jumystary aiaqtalǵanǵa deiin Nur-Sultan – Pavlodar tas jolyndaǵy jóndelip jatqan uzyndyǵy 24 km jol ýchaskesimen júrý tegin bolady.
Tanystyrylymnan keiin suraq-jaýap sessiiasy ótti. Onda «QazAvtoJol» mamandary aqyly ýchaskelerde jol apaty, tehnikalyq aqaý nemese janarmaidyń taýsylýy siiaqty qiyn jaǵdaiǵa tap bolǵan júrgizýshilerge qoldaý kórsetetin qyzmetter jumys isteitinin habarlady. Kómek kórsetý tegin bolady. Qoldaý qyzmetin shaqyrý úshin 1403 qysqa nómiri arqyly «QazAvtoJol» bailanys ortalyǵyna habarlassa jetkilikti.
«Tyńdaýlardyń qorytyndysy boiynsha Pavlodar oblysynyń jurtshylyǵy óńirdiń joldaryn aqyly etý jónindegi memlekettiń josparlaryna oń baǵa berdi. Sonymen qatar, jergilikti turǵyndar ashyq aqyly júie engizilgenge deiin barlyq joldar tiisti jaǵdaiǵa keltirilse degen tilek bildirdi. Sondai-aq, avtojoldar jieginiń enin keńeitý, jańa joldar qurylysynyń sapasyn jaqsartý usynyldy»,-delingen habarlamada.
