Qazaqstandaǵy 51 avtokólik ótkizý beketiniń 12-si pandemiiaǵa bailanysty ýaqytsha jabyldy, dep habarlaidy QazAqparat.
«Qazaqstan shekarasynda 100 ótkizý beketi bar. Onyń 51-i avtokólikterdi ótkizý beketi. Onyń 12-si pandemiiaǵa bailanysty ýaqytsha jabylǵan. Atalǵan halyqaralyq ótkizý beketterinde Shekara qyzmeti memlekettik kirister organymen, densaýlyq saqtaý ministrliginiń bólimshelerimen birlese shekaradan ótý kezinde sanitarlyq sharalardy qamtamasyz etýde», - dedi QR UQK Shekara qyzmeti Shekaralyq baqylaý departamenti bastyǵynyń orynbasary polkovnik Ǵani Aǵadilov OKQ-daǵy baspasóz máslihatynda.
Onyń aitýynsha, jolaýshylar leginiń edáýir azdyǵyna qaramastan, shekaradan jalǵan qujatpen ótýge, taýar-materialdyq qundylyqtardy baqylaýdan jasyrýǵa, tyiym salýlar men shekteýler qoiylǵan azyq-túlik túrlerin ótkizýge, qorǵanys quraldary, meditsinalyq buiymdardy zańsyz shyǵarý faktileri anyqtalyp jatyr.
«Bizdiń tarapymyzdan zańsyzdyqqa jol bermeý úshin meilinshe joǵary dárejede baqylaý qamtamasyz etilgen», - dedi ol.
Eske sala ketsek, buǵan deiin Ǵani Aǵadilov Qazaqstan Tótenshe jaǵdai kezinde de, keiin de memleketaralyq júk tasymaldaýǵa óz shekarasynda eshqandai shekteý qoimaǵanyn habarlaǵan edi.
