QR Parlamenti Májilisiniń depýtaty Nurjan Áltaev zorlyq-zombylyq jazasyn kúsheitý boiynsha QR Qylmystyq Kodeksine qandai ózgerister usynylǵanyn baiandady, dep habarlaidy QazAqparat.
«Qazir qoǵamda áielder men balalardyń zorlyqqa ushyraý máselesi óte ózekti bolyp otyr. Ókinishke qarai, sońǵy kezderi mundai jaǵdai jiiledi. Jańalyqtardan túrli óńirlerde ásirese balalarǵa zorlyq kórsetilgenin jii oqimyz. Bul bizdiń ishki ózegimizdi joǵaltyp jatqanymyzdy bildiredi. Qazaq qoǵamynda mundai jaǵdai bolmaǵan. Menińshe, qazir zorlyqshylarǵa tym jeńil qaraityn tárizdimiz. Buryn olarǵa eń qatań jaza qoldanylatyn. Jaqynda ǵana Táýke hannyń «Jeti jarǵysyn» qaradym, onda zorlyq-zombylyq kisi ólimimen teń sanalǵan jáne aiyptyny ólim jazasyna kesken», - dedi depýtat QR Ádilet ministrligi Zań jobalyq qyzmet máseleleri boiynsha vedomstvoaralyq komissiia otyrysynda.
Spiker keltirgen derekterge sáikes, 2018 jyly Qazaqstanda 100 myń adamǵa 7,88 zorlyq oqiǵasy tirkelgen jáne TMD elderi arasynda Qazaqstan zorlaý boiynsha kósh bastaǵan.
«Zertteý júrgizgen ózge elderde, máselen Ózbekstanda (0,67), Reseide (2,3) bul kórsetkish aitarlyqtai tómen. Bul bizdegi aýyr qylmys boiynsha jaǵdaidyń tym múshkil ekenin kórsetip otyr. 2 tamyzdan bastap men zorlyq qurbandarymen, azamattyq belsendilermen jáne zańgerlermen sóilestim. Kezdesýde eldegi zorlyqtyń taralý sebepterin anyqtadyq. Bul - jazanyń jeńil bolýy, odan jaltarý múmkindikteri, zardap shekkenderdi fizikalyq jáne psihologiialyq qoldaý tetikteriniń bolmaýy. Osyǵan bailanysty, zorlyq-zombylyq jazasyn kúsheitý men sotqa deiingi tergeýde, sot otyrysynda zorlyq qurbandaryn qorǵaý boiynsha QR Qylmystyq Kodeksine, QR Qylmystyq-protsessýaldyq kodeksine ózgerister men tolyqtyrýlar engizýdi usyndyq», - dedi N. Áltaev.
Atalǵan zań jobasynda jynystyq qol suqpaýshylyqqa qarsy qylmys jasaýda jeńil jaza taǵaiyndaý múmkindikterin alyp tastaý kózdelgen.
«Sonymen birge, jynystyq qol suqpaýshylyqqa qarsy asa aýyr qylmys jasaǵan adamdy merziminen buryn, shartty túrde bosatý quqyǵyn alyp tastaý, 18 jastan asqan aiyptylarǵa májbúrli himiialyq kastratsiia jasaý qarastyrylǵan. Mundai qylmysty aýyr qylmys sanatyna aýystyryp, taraptardyń mámilege kelýi boiynsha jazadan jaltarýyna múmkindik berilmeýi tiis. Jynystyq zorlyq úshin qamaý merzimin uzartý kerek. Kámelet jasqa tolmaǵandarǵa jasalǵan zorlyq úshin aýyrlatatyn mán-jailarǵa qarai ómir boiyna abaqtyǵa qamaý, balalarǵa jasalǵan zorlyq úshin - tek qana ómir boiy abaqtyǵa qamaý jazasyn usynamyz», - dedi depýtat.
