«Qazaqstan halqyna» qorynyń qarjylandyrýymen quny óte qymbat onasemogen abeparvovek preparaty satyp alyndy, dep habarlaidy QazAqparat «University Medical Center» korporativtik qoryna silteme jasap.
Bul dári sirek kezdesetin (orfandyq) aýrýlarǵa jatatyn julynnyń bulshyqet atrofiiasy diagnozy qoiylǵan balalarǵa arnalǵan.
«Densaýlyq saqtaý ministrligi onasemogen abeparvovek preparatyn engizýdiń klinikalyq bazasy retinde «UMC« KQ Ana men bala ulttyq ǵylymi ortalyǵyn anyqtady. Búginde ortalyqta preparat 3 balaǵa qoldanyldy. Tórtinshi balaǵa 2022 jyldyń 7-sáýirine josparlanyp otyr. Dárigerler naýqastardyń jaǵdaiyn qanaǵattanarlyq dep baǵalaidy», - delingen vedomstvonyń habarlamasynda.
Densaýlyq saqtaý ministrliginiń shtattan tys bas nevrology, professor Altynshash Jaqsybaevanyń aitýynsha, julynnyń bulshyqet atrofiiasy - julynnyń motorly neirondaryna áser etetin jáne bulshyqettiń álsizdigine ákep soǵatyn genetikalyq aýrý.
«Ol - tuqym qýalaityn aýrýlardan bolatyn balalar óliminiń jii kezdesetin sebepteriniń biri. Uzaq ýaqyt boiy emdelmeitin dert bolyp sanaldy. Alaida, 2016 jyldyń jeltoqsanynda alǵashqy preparaty farmatsevtikalyq naryqqa shyqty. Sol jyly AQSh-ta, 2017 jyly Eýropalyq Odaqta jáne 2019 jyly Reseide qoldanýǵa ruqsat etildi», - deidi maman.
Qazaqstanda qazirgi ýaqytta mundai diagnoz 128 balaǵa qoiylǵan. Bolashaqta olardyń sany 250-ge deiin jetýi múmkin. Tiisinshe, mamandar memlekettik jáne qoǵamdyq uiymdardyń barlyq múmkindikterin paidalanyp, kómekke muqtaj jandardy emdeýge áreket etýdiń mańyzdylyǵyn aitýda.
