«PaperLab» zertteý ortalyǵynyń direktory Serik Beisembaev Qazaqstandaǵy jastar korpýsyn damytý jobasy – Zhas Project kezeńderi boiynsha zertteý qorytyndysyn baiandady, dep habarlaidy QazAqparat.
Aita keteiik, Qazaqstanda jastar korpýsyn damytý jobasyn Bilim jáne ǵylym ministrligi 2016 jyldan beri júzege asyrdy.
Jobanyń basty maqsaty – osal jastardy damytý jáne olarǵa qoldaý kórsetý edi.
Búgin elordada «Jastar korpýsyn damytý jobasyn júzege asyrý qorytyndylary» atty dóńgelek ústel ótip jatyr.
«2021 jyly biz QR Bilim jáne ǵylym ministrliginiń tapsyrysymen zertteý júrgizdik. Zertteýdiń maqsaty – Zhas Project jobasynyń 4 kezeńiniń nátijesin qaraý edi. Zertteý aiasynda biz naqty taldaý júrgizdik, jastar saiasaty salasyndaǵy zańnamany, qarjy aǵyndaryn zerttedik. Onda 9 fokýs toby boldy. Sondai-aq, biz benefitsiarlarǵa saýalnama júrgizdik, mentorlardan, memlekettik qurylym ókilderinen, jalpy 700 adamnan suhbat aldy», - dedi zertteý ortalyǵynyń basshysy.
Serik Beisembaevtyń aitýynsha, Táýelsizdik jyldary jastar saiasatynyń damyǵan infraqurylymy qalyptasty dep aitýǵa bolady.
«Jastar saiasaty qalai qarjylandyrylady? Munda ákimdikter, jergilikti atqarýshy organdar jáne granttyq qarjylandyrý júiesi arqyly iske asyrylatyn memlekettik áleýmettik tapsyrys syndy birneshe derekkózdi kórsetýge bolady. Búgingi tańda operator – memlekettik bastamalardy qoldaý ortalyǵy bolyp otyr. Salalyq memlekettik baǵdarlamalar aiasynda «Eńbek» baǵdarlamasy, Jastar praktikasy, Biznes Bastaý syndy jastar saiasaty qarjylandyrylady. Zertteý aiasynda 2016 jyldan 2021 jylǵa deiingi shyǵyndar taldandy. 5 jylda memlekettik biýdjetten 13 mlrd teńgege jýyq qarajat bólindi. Bul rette qarajattyń jartysy jastar ortalyqtaryn ustaýǵa jumsalǵan. Bul - jastar saiasatyna jumsalatyn shyǵynnyń bir bóligi. Salalyq baǵdarlamalar, granttyq qarjylandyrý arqyly aitarlyqtai qarajat bólinedi», - dedi Serik Beisembaev.
Ortalyq basshysy memlekettik basqarý júiesine kóshý kezindegi jobany iske asyrýda qandai syn-qaterler bolatynyn aitty.
«Zhas Project jobasynda óte kóp steikholderler bar. Sondai-aq protsesterdiń biýrokratiialanýyna jol bermeý kerek. Zhas Project jastardyń kontseptýaldy damý tásiline negizdeldi, ol qatań kórsetkishterge qol jetkizýdi kózdemeidi. Munda senim máselesine nazar aýdarǵym keledi. Qarajatty irikteý, bólý júiesi jáne jergilikti jerlerde shynaiy mýltiplikatsiialyq áser alýǵa múddeli áriptesterdiń, úilestirýshilerdiń, mentorlardyń tartylýy senim týdyrady», - dedi Serik Beisembaev.
