Qazaqstanda Jastar korpýsyn damytý jobasyna 10 myńǵa jýyq jastar qatysty jáne 3 myń granttyq jobany júzege asyrdy. Bul týraly jobany basqarý jónindegi toptyń úilestirýshisi Gúlmira Eskendirova aityp berdi, dep habarlaidy QazAqparat.
Onyń aitýynsha, Jastar korpýsyn damytý jobasyn QR Bilim jáne ǵylym ministrligi men Dúniejúzilik bank 2016 jyldan bastap júzege asyrdy jáne 2021 jyly aiaqtady. Búgin elordada «Jastar korpýsyn damytý jobasyn júzege asyrý qorytyndylary» atty dóńgelek ústel ótip jatyr.
«Joba úsh komponentten turdy. Olardyń ishindegi eń irisi – Zhas Project granttyq baǵdarlamasy boldy. Ekinshi komponent jastardy damytýǵa jaýapty ministrlikterdi – QR Bilim jáne ǵylym ministrligin, Aqparat jáne qoǵamdyq damý ministrligin institýtsionaldyq damytýǵa baǵyttaldy. Ministrlikterdiń jastar saiasatyndaǵy institýtsionaldylyǵyn sheshý jáne nyǵaitý, jas qyzmetkerlerdiń áleýetin arttyrý úshin túrli maqsattar qoiyldy. Jobany iske asyrý barysynda granttyq baǵdarlamaǵa 10 myńǵa jýyq jas qatysyp, 3 myńǵa jýyq granttyq jobany júzege asyrdy. Ekinshi komponent aiasynda jastar saiasaty boiynsha strategiialyq qujattardy durys zertteýge, ázirleýge baǵyttalǵan 6 tapsyrma oryndaldy», - dedi G. Eskendirova elordada ótken dóńgelek ústelde.
Spiker atap ótkendei, jastar 1 mln teńgege deiin grant alǵan. Olar top ishinde jumys istedi jáne toptyń árbir múshesi 6 ai boiy 40-60 myń teńge kóleminde stipendiia alǵan. Granttyq qarjylandyrý ózderiniń áleýmettik ideialaryn usynǵan jastarǵa bólingen. Áleýmettik jobalar túrli ideialarǵa baǵyttalǵan. Jastar sport klýbtaryn, tigin tsehtaryn, aiaq kiim salondaryn, nan-toqash ónimderiniń shaǵyn óndiristerin ashqan.
«Biz olardyń aldyna ideiany bizneske ainaldyrý mindetin qoiǵan joqpyz. Bul úshin kóptegen basqa baǵdarlamalar bar. Bizdiń jobamyz biznesti bastaý úshin daǵdylary joq jastarǵa baǵyttalǵan. Iaǵni, olarǵa óz daǵdylaryn shyńdaýǵa múmkindik berdik, olar jobalyq basqarýdy úirendi, mentorlarmen jumys istedi. Ókinishke orai, qazir jobany qarjylandyrý aiaqtaldy. Bul bastamany Aqparat jáne qoǵamdyq damý ministrligine beremiz. Ministrlik te jobany jalǵastyrýdy josparlap, qarastyryp jatqanyn estidik», - dedi Gúlmira Eskendirova.
