Foto ©️ Tengrinews.kz / Týrar Kazangapov
Qazaqstanda ziian eńbek jaǵdaiynda jumys isteitinder úshin arnaýly áleýmettik tólem engizildi, - dep habarlaidy "Ult aqparat" Eńbek jáne halyqty áleýmettik qorǵaý ministrliginiń baspasóz qyzmetine silteme jasap.
"Memleket basshysynyń tapsyrmasyn iske asyrý sheńberinde eńbek jaǵdailary ziiandy jumysta uzaq ýaqyt boiy isteitin adamdardy áleýmettik qorǵaý deńgeiin arttyrý úshin 2024 jylǵy 1 qańtardan bastap arnaýly áleýmettik tólem engizildi.
Arnaýly áleýmettik tólemderdi taǵaiyndaýdyń mindetti sharttary mynadai: 55 jasqa tolý jáne BJZQ-da keminde 7 jyl kásiptik zeinetaqy aýdarymdarynyń bolýy.
Arnaýly áleýmettik tólem birneshe komponentten turady jáne tórt qarajat kózinen júzege asyrylady: respýblikalyq biýdjetten 2 eń tómen kúnkóris deńgeii mólsherinde arnaýly kásiptik járdemaqy; ómirdi saqtandyrý jónindegi kompaniialardan 1 eń tómen kúnkóris deńgeii mólsherinde; jumys berýshilerdiń qarajaty esebinen 1 eń tómen kúnkóris deńgeii mólsherinde, BJZQ-dan mindetti kásiptik zeinetaqy jarnalary esebinen. Budan basqa, jumyskerlerge BJZQ-daǵy zeinetaqy jinaqtaryn eskere otyryp, mindetti zeinetaqy jarnalary esebinen tólemder alý quqyǵy beriledi", - delingen habarlamada.
Vedomstvo málimetinshe, áleýmettik kodekske sáikes jumys berýshiler kásipteri men qyzmet túrleri Eńbek jaǵdailary ziiandy jumystarmen ainalysatyn jumyskerlerdiń, óndiristerdiń, jumystardyń, kásipterdiń tizbesine engizilgen jumyskerler úshin mindetti kásiptik zeinetaqy jarnalaryn aýdarady, olardyń 2 myńnan astam pozitsiiasy bar. Osylaisha, arnaýly áleýmettik tólem ekonomikanyń 19 salasynda, onyń ishinde taý-ken óndirý jáne óńdeý ónerkásibinde jáne basqalarynda jumys isteitin qazaqstandyqtarǵa tiesili bolady.
"Tólem zeinetkerlik jasqa deiin tólenedi. Arnaýly áleýmettik tólemderdi alý úshin eńbek jaǵdailary ziiandy jumystarmen ainalyspaýǵa tiis. Jumyskerler jeńil jumysqa aýysa alady, sodan keiin olar jalaqy men tólem alady nemese demalysqa shyǵyp, zeinetke shyqqanǵa deiin arnaýly áleýmettik tólemder alady.
Biryńǵai jinaqtaýshy zeinetaqy qorynyń derekteri boiynsha arnaýly áleýmettik tólemdi taǵaiyndaý úshin mindetti sharttardy eskere otyryp, oǵan 2024 jyly 37 myńnan astam jumysker, 2030 jyly – 58 myńnan astam, 2035 jyly – 95 myńnan astam jumysker úmitker bola alady. Osylaisha, áleýetti tólem alýshylar sany jyl saiyn ulǵaiady" - delingen habarlamada.
Aldyn ala derekter boiynsha, 2024 jyly arnaýly áleýmettik tólemniń ortasha mólsheri jalpy alǵanda 208 myń teńgeden asady. Árbir jumysker úshin tólem mólsheri BJZQ-daǵy jinaqtarǵa bailanysty bolady. Bul rette jyl saiyn arnaýly áleýmettik tólem mólsheri eń tómen kúnkóris mólsheriniń ulǵaiýyna bailanysty ósedi. Aldyn ala esepteýler boiynsha 2030 jyly tólemniń ortasha mólsheri 339 myń teńgeni, al 2035 jyly – 519 myń teńgeni quraidy.
