Eńbek jáne halyqty áleýmettik qorǵaý ministrligi zeinetaqy tólemderi qalai jáne qashan ósetinin aitty, - dep habarlaidy "Ult aqparat".
"Qasym-Jomart Toqaevtyń 1 qyrkúiektegi Qazaqstan halqyna Joldaýynda zeinetaqy júiesiniń tiimdiligin arttyrý boiynsha jańa sharalar kesheni usynyldy. Olardy iske asyrý maqsatynda QR Áleýmettik kodeksiniń jobasy sheńberinde bazalyq zeinetaqy mólsherin arttyrý jáne yntymaqty zeinetaqyny esepteý úshin eń joǵary tabysty ulǵaitý kózdeledi. Buǵan deiin qabyldanǵan sheshimdermen birge bul 2025 jylǵa qarai jiyntyq zeinetaqyny orta eseppen 27%-ǵa ulǵaitýǵa múmkindik beredi.
Qazaqstanda bazalyq jáne yntymaqty zeinetaqylardy, sondai-aq BJZQ-dan zeinetaqy tólemin (qyzmetkerdiń zeinetaqy jinaqtary esebinen qalyptastyrylatyn) qamtityn kóp deńgeili zeinetaqy júiesi qalyptasty.
Yntymaqty zeinetaqy júiesi birtindep qysqaratyny belgili, óitkeni olardy taǵaiyndaý kezinde 1998 jylǵy 1 qańtarǵa deiin, iaǵni jinaqtaýshy júiesi engizilgenge deiingi eńbek ótili eskeriledi" - delingen habarlamada.
Eńbek ministrliginiń málimetinshe, zeinetaqy júiesiniń tiimdiligin arttyrý jáne azamattardy tiisti zeinetaqymen qamtamasyz etý maqsatynda Áleýmettik kodeks jobasy sheńberinde
Mynadai ózgerister engizý josparlanǵan:
"Birinshi. 2023 - 2027 jyldar aralyǵyndaǵy kezeńde eń tómengi bazalyq zeinetaqynyń mólsherin kezeń-kezeńimen eń tómengi kúnkóris deńgeiiniń shamasynan 54-ten 70 paiyzǵa deiin, eń joǵary mólsherin 100-den 120 paiyzǵa deiin jetkizý kózdelip otyr.
Osy kezeńde bazalyq zeinetaqy mólsheri orta eseppen 51 paiyzǵa deiin arttyrylatyn bolady. Bul rette bazalyq zeinetaqynyń ortasha mólsheriniń jyl saiynǵy ósýi shamamen 13 paiyz bolady jáne barlyq 2 million zeinetkerge qatysty bolady.
Ekinshi. 2023 jylǵy 1 qańtardan bastap zeinetke shyǵatyn azamattar úshin yntymaqty zeinetaqylardy esepteý úshin paidalanylatyn eń joǵary tabystyń shamasyn 46-dan 55 ailyq eseptik kórsetkishke deiin arttyrý kózdeledi", - delingen habarlamada.
Usynylyp otyrǵan sharalar 2025 jylǵa qarai jiyntyq zeinetaqyny orta eseppen 27 paiyzǵa (3 jyl ishinde - 109-dan 138 myń teńgege deiin) arttyrýǵa jáne jiyntyq zeinetaqydaǵy memlekettik tólemderdiń úles salmaǵyn arttyrýǵa múmkindik beredi.
"Osylaisha, memleket qart adamdar arasynda kedeiliktiń ósýine jol bermeý boiynsha mindettemeler qabyldaidy", - deidi vedomstvonyń baspasóz qyzmeti.
