Belgili qazaqstandyq qarjyger, metallýrg jáne saiasatker Dáýlet Sembaev 87 jasqa qaraǵan shaǵynda dúnieden ozdy. Aqparatty QR Ulttyq banki rastady.
Dáýlet Hamituly Sembaevtyń búgin túnde qaitys bolǵany habarlandy.
Sembaev - Egemen Qazaqstannyń alǵashqy banknotynda qoltańbasy bar tulǵa. Qazaqstandaǵy 1998 jylǵy zeinetaqy reformasyn jasaýshylardyń biri retinde tanymal.
Ol 1935 jyldyń 10 tamyzynda Almaty qalasynda, muǵalim, keiin Qazaq KSR Halyq Komissary, oqý ministri bolǵan Ábdihamit Sembaevtyń otbasynda dúniege kelgen. 1958 jyly Qazaq taý-ken metallýrgiia institýtyn injener-metallýrg mamandyǵy boiynsha bitirgen.
Toqsanynshy jyldary Dáýlet Sembaev Ulttyq bank tóraǵasy, premer-ministrdiń orynbasary, Senat depýtaty qyzmetterin atqardy. 2009 jyldyń jeltoqsan aiynan bastap Halyqaralyq biznes akademiiasynyń Qamqorshylyq keńesiniń múshesi.
Ol - Qazaqstan Prezidentiniń alǵashqy ekonomikalyq baǵdarlamasynyń qos avtorlarynyń biri. Sondai-aq, Qazaqstandaǵy ulttyq valiýtany engizýge qatysqan. Eldegi qazirgi bank júiesin qalyptastyrýdyń basy-qasynda bolǵan jan.
Oraz Jandosov, Grigorii Marchenko jáne basqa da elimizdiń kórnekti qarjygerleri ózderin sol kisiniń shákirti sanaidy.
Dáýlet Hamituly «Qurmet belgisi» (1976), Eńbek Qyzyl Tý (1981), «Parasat» (1996) ordenderimen jáne KSRO-nyń eki medalimen marapattalǵan.
