Elimiz «Iandeks Taksi»-diń basshylyǵymen júrgizýshilerge áleýmettik jarna tóleý jóninde kelisimge keldi. Bul týraly QR Eńbek jáne halyqty áleýmettik qorǵaý ministri Tamara Dúisenova málim etti, dep habarlaidy QazAqparat.
«Biz áleýmettik kodekske frilanserlerdiń eńbek quqyǵyn qorǵaýǵa qatysty ózgerister engizdik. Áleýmettik kodekske sáikes azamattar kúnine 8, aptasyna 40 saǵat jumys isteýi tiis. Bul jerde áńgime tolyqqandy jumys isteitin azamattarǵa qatysty. Al endi frilans bolyp nemese negizgi jumysynan keiin qosymsha eńbektenetin jumysshylardyń quqyǵy áli kúnge deiin zań arqyly rettelmegen. Men jaqynda ǵana elimizdegi 8 iri onlain platformanyń basshylarymen kezdesý ótkizdim. Sol kezde basshylardan jumysshylar tótenshe jáne jazataiym jaǵdaiǵa ushyrap qalsa, qandai saqtandyrý qarastyrylǵan degende, eshqandai saqtandyrý joq degen jaýap aldym», - dedi Tamara Dúisenova «Qazaqstan» ulttyq telearnasynda bolǵan «Jedel jeli» baǵdarlamasynyń efirinde.
Ministr keltirgen málimetke sáikes búginde túrli onlain platformalarda 500 myńnan astam otandasymyz jumys istep jatyr.
«Keshe ǵana tsifrlyq damý ministri Baǵdat Mýsinmen birge «Iandeks Taksi»-diń basshylyǵymen kezdestik. Sol kezdesýde taksi júrgizýshilerine áleýmettik jarna tóleý jóninde kelisimge keldik», - deidi vedomstvo basshysy.
