Ishki ister ministri Erlan Turǵymbaev elimizde ýchaskelik inspektorlardyń ókilettigi qalai keńeitiletinin túsindirdi, dep habarlaidy QazAqparat.
«Ýchaskelik inspektor mártebesin kóterý boiynsha tiisti sharalar qabyldanyp jatyr. Ákimshilik ister men quqyq buzýshylyq profilaktikasy salasynda olardyń ókilettigin keńeitý josparlanyp otyr», - dedi ministr Senattaǵy politsiia qyzmetine qatysty Úkimet saǵatynda.
Osy oraida ol zańnamaǵa tiisti túzetýler ázirlengenin jetkizdi.
E. Turǵymbaevtyń aitýynsha, ishki rezervter esebinen ýchaskelik inspektorlardyń shtattyq sanyn arttyrý josparlanyp otyr. Qazirgi kezde 6 473 bolsa, taǵy da úsh myńnan astam ýchaskelik inspektor jetispeidi.
«Sonymen qatar qalalarda aǵa ýchaskelik inspektor institýtyn qalpyna keltirý eskerilgen. Qylmystyq quqyq buzýshylyqtyń 60 paiyzy oblys ortalyqtarynda jasalady. Sondyqtan politsiianyń ýchaskelik pýnktteri azamattardy qorǵaýdyń aldyńǵy shebi bolýy tiis. Osy oraida tiisti ókilettikpen aǵa ýchaskelik inspektordy bekitý josparlanǵan», - dedi vedomstvo basshysy.
Budan bólek, aýyldarda ýchaskelik inspektor biliktiń jalǵyz ókili ekenin eskere otyryp, olardyń árqaisysyna kómekshini usyný qarastyrylǵan.
«Ýchaskelik politsei 100 shaqyrym jerdegi basqa eldi mekenge qyzmet babymen baratyn jaǵdailar jii kezdesedi. Osy oraida politsiianyń ýchaskelik pýnkti jabyq qalady. Sondyqtan olarǵa kómekshi qyzmetin engizýdi josparlap otyrmyz», - dedi ministr.
