Foto: Zakon.kz
Qazaqstanda UBT men joǵary oqý oryndaryna qabyldaý júiesin jańartý josparlanyp otyr. Bul týraly Premer-ministrdiń orynbasary – mádeniet jáne aqparat ministri Aida Balaeva málimdedi, dep habarlaidy Ult.kz.
Onyń aitýynsha, adami kapitaldy damytý – memlekettik saiasattaǵy negizgi baǵyttardyń biri. Sondyqtan bilim berý júiesi tek teoriialyq bilimmen shektelmei, eńbek naryǵyna beiimdelgen, naqty daǵdylary bar mamandardy daiarlaýǵa basymdyq berýi tiis.
Ministr UBT kóp jyl boiy JOO-ǵa túsý kezinde ashyqtyq pen teń múmkindikterdi qamtamasyz etip kelgen tiimdi qural ekenin atap ótti. Degenmen ýaqyt talabyna sai bilim berý úrdisteri, eńbek naryǵynyń suranysy men baǵalaý tásilderi ózgerip otyrǵandyqtan, bul júieni jetildirý qajettigi týyndap otyr.
Atap aitqanda, pedagogikalyq mamandyqtarǵa qabyldaý kezinde testileýmen qatar arnaiy emtihandardy qamtityn aralas (gibridti) baǵalaý júiesin engizý usynylýda. Bul rette talapkerlerdiń tek pándik bilimi ǵana emes, oilaý qabileti, taldaý daǵdylary men oqýǵa daiyndyǵy da eskerilmek.
Balaevanyń sózinshe, pedagog bolý – úlken jaýapkershilikti talap etetin erekshe mamandyq. Sondyqtan bolashaq muǵalimderdiń kásibi jáne tulǵalyq qasietterine de nazar aýdarý mańyzdy. Osyǵan bailanysty kelesi jyldan bastap pedagogikalyq baǵyttarǵa túsý kezinde UBT nátijelerimen qatar aýyzsha emtihandar da esepke alynbaq. Bul emtihandarda talapkerlerdiń syni oilaý jáne kommýnikatsiialyq qabiletteri baǵalanady.
Sonymen birge talapkerlerdiń daiyndyq deńgeiin baǵalap, óz bilimin túzetýine múmkindik beretin synaq testileý júiesi saqtalady.
Ministr taǵy bir usynys retinde Foundation baǵdarlamalary arqyly shartty qabyldaý tájiribesinen bas tartýdy kóterdi. Sebebi statistikaǵa sáikes, mundai jolmen túsken stýdentterdiń shamamen 50–60 paiyzy oqý barysynda qajetti eń tómengi baldy jinai almaidy.
Aida Balaeva bul ózgerister UBT-dan tolyq bas tartýdy bildirmeitinin atap ótti. Kerisinshe, bul júieni jetildirý arqyly daryndy talapkerlerdi anyqtap, ádil irikteý tetikterin kúsheitýge baǵyttalǵan qadam bolmaq.
