Qazaqstanda turǵyndarynyń sany 10-ǵa jetpeitin 45 aýyl bar. Ortalyq kommýnikatsiialar qyzmetinde ótken brifingide QR Indýstriia jáne infraqurylymdyq damý ministrligi Qurylys jáne turǵyn úi-kommýnaldyq sharýashylyq isteri komiteti tóraǵasynyń orynbasary Beibit Shahanov osyndai málimet berdi, dep habarlaidy QazAqparat.
«El boiynsha barlyǵy 6 316 aýyl bar. Onyń ishinde halyq sany 50 adamnan kem – 348 aýyl (10,1 myń adam) jáne 10 adamnan kem – 45 aýyl (253 adam) bar. Onyń ishinde 3 991 aýyl ortalyq sýmen qamtylǵan, 403 aýylda keshendi blok-modýlder ornatylǵan.
Aýyzsýmen qamtylmaǵan 1 922 aýyldyń 793-inde ortalyqtandyrylǵan sýmen jabdyqtaý júielerin salý jumystaryn jalǵastyrý josparlanyp otyr», - dedi komitet basshysynyń orynbasary.
Onyń málimeti boiynsha, turǵyn sany 200-ge jetpeitin aýyldarǵa keshendi blok-modýlder ornatylmaq.
«Qarajatty tiimdi paidalaný úshin halyq sany 200-den kem 1 129 usaq aýylda keshendi blok-modýlder ornatylady. Keshendi blok-modýlderdiń baǵasy, ornatý jáne paidalaný joldary jeńil. Qajet bolǵan jaǵdaida aýyldan aýylǵa tasymaldaý múmkindigi bar.
Biyl jergilikti atqarýshy organdardyń jedel aqparatyna sáikes 368 aýyldy qamtý josparlanýda. Onyń ishinde 148 aýylda ortalyq sýmen jabdyqtaý jáne 220 aýylda jergilikti biýdjet qarajaty esebinen keshendi blok-modýlder ornatý josparlanýda», - dedi Beibit Shahanov.
