Astanadaǵy Ana men bala ortalyǵynda jasóspirimniń jaq súiegine titandyq implant engizildi. Mundai operatsiia Qazaqstanda tuńǵysh ret jasaldy, dep habarlaidy "Ult aqparat" «Habar 24» telearnasyna silteme jasap.
17 jastaǵy stýdent jol apaty saldarynan 12 jyl boiy aýzyn tolyq asha almai, qiyndyq kórgen. Operatsiia sátti ótti. Endi dárigerler bul tyń ádisti keńinen meńgerip, eldiń barlyq óńirinde engizýge nietti. Sebebi, Qazaqstanda 40-qa jýyq bala osyndai emge muqtaj. Al shetelde mundai operatsiianyń quny 50 myń dollardan asyp jyǵylady.
Stýdent balaǵa otandyq dárigerler buǵan deiin 3 ret operatsiia jasaǵan. Biraq nátije bolmaǵan. Keiin Dias Ana men bala ortalyǵyna júgingen. Jasóspirim qazir ózin jaqsy sezinedi. Aýzyn tolyq ashyp, ózdiginen tamaqtanady, emin-erkin sóileidi. Tipti, 8 keli salmaq qosqan. Diastyń oń jaq súiegine qazir protez salyndy. Biraq ony jasaý ońaiǵa soqpaǵan. Mamandar jasóspirimniń sýretin arnaiy kompiýterlik baǵdarlamaǵa salyp, 3D keskinin jasaǵan. Sosyn protezdi shetelden arnaiy tapsyryspen aldyrtqan.
Al buryn-sońdy bolmaǵan emdi ázirge ortalyqta, hirýrg Rýslan Sia-Týn-Chin ǵana meńgergen. Ol úshin maman Reseide arnaiy bilimin shyńdaǵan. Árine, bilikti maman jyl saiyn 180-nen asa operatsiia jasap júrse de, mundai kúrdeli emdi alǵash ret qoldanǵan. Bes saǵatqa sozylǵan operatsiiaǵa Rýslannan bólek 7 maman qatysty. Em-dom sátti aiaqtaldy.
«Arnaiy protez daiyndamai, standartty túrin qoldanýǵa bolady. Biraq tájiribe onyń tiimdiligi az ekenin kórsetip otyr. Árine, titannan jasalǵan protezdiń ornyna adamnyń san eti súiegin alyp, jaǵyna sáikestendirip qoiýǵa bolady. Biraq ýaqyt óte kele súiek qurylysy 20-30 paiyzǵa sorylyp, jaqtyń uzyndyǵy men biiktigine sáikes kelmeýi múmkin. Sondyqtan biz balaǵa arnaiy ózine laiyqtap jasalǵan protez saldyq. Bala ósse de, protezdiń eshqandai keri áseri bolmaidy», - deidi jaq-bet súiegi hirýrgy Rýslan Sia-Týn-Chin.
Dárigerlerdiń aitýynsha, mundai operatsiiany jasóspirim 15 jastan asqan kezde ǵana jasaýǵa bolady. Sebebi, oǵan deiin balanyń jaq-bet súiegi ósip-jetiledi. Al elimizde mundai em-domǵa muqtaj jandar barshylyq. Ana men bala ortalyǵy olarǵa kómek qolyn sozýǵa daiyn.
«Alǵan implanttyń baǵasy bar, 3D salǵan baǵasy bar. Sonda 2-3 mln shyqty. Ózimizde jasasaq, osynsha aqsha. Qazir problema joq. Dárigerler kórdi. Óz qoldaryna senip, ári qarai ony damytsa, endi úkimettiń kómegi bolsa. Dárileri, shyǵyn zattary bolsa, ony isteidi», - Ana men bala ortalyǵy direktorynyń orynbasary Sholpan Altynova.
