Qazaqstanda tumaý anyqtalǵan joq. Bul týraly QR Densaýlyq saqtaý ministri Aleksei Tsoi aitty, dep habarlaidy QazAqparat.
«Tumaý men JRVI boiynsha epidemiologiialyq maýsymnyń bastalýyna bailanysty ministrlik halyqtyń syrqattanýshylyǵyna, vaktsina alýyna monitoring júrgizýde. Respýblikada 1 qyrkúiekten 850 JRVI jaǵdaiy tirkeldi, tumaý anyqtalǵan joq. Búgingi kúni tumaýǵa qarsy 694 710 adam egildi, Onyń ishinde 684 051-i – tegin, 9 370-y jumys berýshiler esebinen jáne 1 289-y aqyly negizde ekpe aldy. Halyqty egýmen qamtýdyń barynsha joǵary paiyzy Túrkistan, Pavlodar, Qaraǵandy oblystarynda jáne Shymkent qalasynda baiqalady», - dedi Aleksei Tsoi Ortalyq kommýnikatsiialar qyzmetindegi baspasóz máslihatynda.
Onyń atap ótýinshe, JRVI men tumaýǵa qarsy vaktsinatsiia jalǵasyp jatyr. Vaktsinanyń kólemi jetkilikti.
«Koronavirýs infektsiiasy men jiti respiratorlyq virýstyq infektsiianyń klinikasy uqsas. Aldaǵy tumaý men JRVI boiynsha epidemiialyq maýsymdy eskere otyryp, meditsinalyq kómekke ýaqytyly júginý qajet. Qorytyndylai kele, mynaǵan nazar aýdarsańyzdar, ózińizge jáne basqa adamdarǵa aýrý juqtyrmaý úshin qarapaiym profilaktika is-sharalaryn saqtap, vaktsinany ýaqytyly alý qajet. Koronavirýs infektsiiasy boiynsha epidemiologiialyq jaǵdaidy turaqtandyrý, árqaisymyzdyń jáne jaqyndarymyzdyń densaýlyǵy óz qolymyzda», - dedi ministr.
