15 jeltoqsanda tsifrlyq teńge pilottyq jobasyna qatysty qorytyndy baiandama jariialanady. Bul týraly búgin Úkimet otyrysynda QR Ulttyq banki tóraǵasy Erbolat Dosaev aitty, dep habarlaidy QazAqparat.
«Ulttyq bank qarjy sektorynyń tsifrlyq infraqurylymyn damytý jáne qarjylyq innovatsiialardy engizý baǵdarlamasyn belsendi túrde iske asyryp jatyr. Ulttyq tsifrlyq valiýta – tsifrlyq teńgeni engizýdi kózdeitin pilottyq - joba biylǵy jyldyń negizgi bastamalarynyń biri. Joba qarjy naryǵynyń qatysýshylarymen jáne halyqaralyq áriptestermen birlesip iske asyrylýda. Búginde álemde 63 ortalyq bank ulttyq tsifrlyq valiýtalardy shyǵarý jáne olardyń ainalymy máselesin zertteýmen belsendi túrde ainalysýda. Ortalyq banktiń bólshek tsifrlyq valiýtasynyń aspektileri Ulttyq banktiń 2021 jylǵy zertteýleriniń basty baǵyty boldy», - dedi ol.
Onyń atap ótýinshe, qazirgi ýaqytta tsifrlyq teńge platformasynyń prototipin ázirleý aiaqtaldy. Naryq qatysýshylarymen jáne halyqaralyq uiymdarmen talqylaýlar seriiasy ótkizildi.
Pilottyq jobanyń aralyq nátijeleri Qazaqstan qarjygerleriniń IX kongresinde tanystyryldy.
«2021 jylǵy 15 jeltoqsanda pilottyq jobanyń nátijeleri boiynsha qorytyndy baiandama jariialanady. Memleket basshysynyń tapsyrmasy boiynsha Ulttyq bank 2022 jylǵy 1 shildege deiin paida men shyǵystardy baǵalai otyryp, tsifrlyq teńgeni engizý týraly sheshim qabyldaý modelin ázirleidi. 2022 jylǵy jeltoqsanda tsifrlyq teńgeni engizý qajettiligi týraly qorytyndy sheshim ázirlenedi», - dedi Erbolat Dosaev.
