Qazaqstan Táýelsizdiginiń 30 jyldyǵyn atap ótý aiasynda QR Aqparat jáne qoǵamdyq damý ministrligi «Táýelsizdiktiń men úshin mańyzy» jobasyn iske qosýda. Qazaqstandyqtarǵa jeke ómir tarihy, sezimderi men estelikteri turǵysynan Táýelsizdikke úńilý usynylady, dep habarlaidy "Ult aqparat".
Joba aiasynda elimizdiń turǵyndary táýelsiz memlekette turýdyń máni jaiynda óz pikirlerimen bólisedi. Qazaqstandyqtar qazirgi egemendi dáýirdiń arqasynda jetken jetistikteri týraly jeke ómir tarihtaryn aita alady.
«Táýelsizdik – kez kelgen memlekettiń eń basty qundylyǵy. Jańa ǵasyr bastaýynda biz ata-babalarymyzdyń táýelsizdik týraly ǵasyrlyq armanyn oryndadyq. Sol kezde Qazaqstannyń Tuńǵysh Prezidenti Nursultan Ábishuly Nazarbaev óz halqy úshin tarihi erlik jasady. Qazaqstandyqtar úshin 30 jyl - jai ǵana merekelik kún emes, bul – tabystyń, rýh pen bolashaqqa degen umtylystyń belgisi», - dep atap ótti Aqparat jáne qoǵamdyq damý ministri.
Aida Balaeva barlyq qazaqstandyqtardy aýqymdy onlain jobaǵa qatysýǵa shaqyrdy.
Joba qatysýshylary táýelsiz Qazaqstannyń azamaty bolý neni bildiretinin aityp bere alady. Olar ózderiniń jeke jetistikteri men jeńisterimen bólisip, óz eli úshin otansúigishtik pen maqtanysh sezimin sezingen sátterdi eske túsire alady.
Jobaǵa qatysý úshin óz áńgimeńizdi áleýmettik jelilerdegi jeke akkaýntyńyzda #Qazaqstan30 heshtegimen uzaqtyǵy 1 minýttan aspaityn beinejazba formatynda jariialaý qajet. Sondai-aq beine áńgimeni QR AQDM jobalyq keńsesiniń info@30jyl.kz elektrondyq mekenjaiyna jiberýge bolady.
Eń áserli ári erekshe oqiǵalar, estelikter respýblika telearnalarynyń efirinde kórsetilip, BAQ-ta jariialanady.
Jobanyń barysy 30jyl.kz – Qazaqstan Táýelsizdiginiń 30 jyldyǵyna arnalǵan saitta qadaǵalanatyn bolady.
