17 tamyz kúni Qazaqstanda 7034 adamnyń PTR testi oń nátije kórsetti. Bul týraly densaýlyq saqtaý ministrligi habarlady.
Almaty qalasy men Qaraǵandy oblysynda naýqas sany ádettegidei myńnan asty. Birinshisinde 1403, ekinshisinde 1049 naýqas tirkeldi. Shildeniń sońǵy onkúndiginde táýlik saiyn 1,5 myń naýqas shyǵyp júrgen Nur-Sultanda koronavirýsqa 735 adam shaldyqty.
Keiingi eki aida Qazaqstanda koronavirýstyń taraýy kúrt kúsheidi. Shildeniń sońynan beri kún saiyn 7-8 myń naýqas tirkelip jatyr. Mamandar muny juqpalyǵy joǵary ári aýyl halge jyldam túsiretin "delta" variantymen bailanysty. Alǵash ret Úndistanda anyqtalǵan bul variant Qazaqstanda maýsymnyń sońynda tirkeldi.
Indet bastalǵaly elde barlyǵy 708 379 Covid juqtyrý jaǵdaiy tirkelgen. Onyń ishinde 7867 adam aýrýdan aiyǵa almai, qaitys bolǵan. Bilik bul tizimge koronavirýs juqtyrǵany rastalǵan, biraq "ózge aýrýdan qaitys boldy" degen 2 myńnan astam adamdy qospai otyr.
Qazaqstan úkimeti byltyr 1 tamyzdan bastap PTR testi teris nátije kórsetken, biraq aýrý belgileri boiynsha koronavirýsqa uqsaityn "kovidtektes pnevmoniia" (KVI-) esebin júrgizip keledi. Osy kúnge deiin pnevmoniianyń bul túrimen 66 381 naýqas tirkeldi, onyń ishinde 4111 adam qaitys bolǵan.
Elde koronavirýs statistikasynyń rastyǵyna kúmán keltiredi. Densaýlyq saqtaý ministrligi byltyr qańtardan tamyzǵa deiin 256 myń adam pnevmoniiaǵa shaldyqqan, arasynda koronavirýs belgileri bar naýqastar kezdesedi degen. Biraq olardyń eshqaisysy koronavirýs statistikasyna kirmedi.
18 tamyzdaǵy málimet boiynsha, elde 120 313 adam koronavirýs infektsiiasynan (–115 214 + jáne 5 099 KVI-) emdelip jatyr.
Olardyń ishinde 30 123 patsient statsionarda, 90 190 naýqas ambýlatoriialyq deńgeide em qabyldaýda.
KVI+, KVI- shaldyqqandardyń arasynda:
• 1 840 adamnyń jaǵdaiy aýyr,
• 561 patsienttiń jaǵdaiy óte aýyr,
• 263 naýqas jasandy tynys alý apparatynda jatyr.
Búgingi kúnge deiin Qazaqstanda koronavirýsqa qarsy vaktsinanyń I komponentin 6 183 445 adam saldyrsa, II komponentin 4 819 587 adam qabyldaǵan.
