Energetika vitse-ministri Áset Maǵaýov elimizde Geologiialyq barlaý memlekettik baǵdarlamasy ázirlenip jatqanyn málim etti, dep habarlaidy "Ult aqparat".
«Geologiialyq barlaý sektorynyń investitsiialyq tartymdylyǵyn jaqsartý boiynsha júrgizilip jatqan jumysty atap ótken jón. Jer qoinaýyn paidalaný salasyn retteýdi jeńildetý úshin túzetýler toptamasy ázirlendi. Jer qoinaýyn paidalaný quqyǵyn berý boiynsha elektrondyq aýktsion tetigi ázirlendi. Teńizdegi geologiialyq barlaýǵa basymdyq berýdiń arqasynda 2018 jyldan bastap birqatar joba iske asyryldy. Atap aitqanda, «QazMunaiGaz» jáne áriptes ENI – Isatai, Abai kenishterin, «QazMunaiGaz» ben «Lýkoil» kompaniiasy Jeńis blogyn damyta bastady», - dedi Áset Maǵaýov OKQ-da ótken baspasóz máslihatynda.
Vitse-ministrdiń aitýynsha, teńiz jobalarymen birge Qazaqstannyń az zerttelgen aýmaqtarynda geologiialyq barlaýdy jandandyrý josparlanyp otyr.
«Ekologiia, geologiia jáne tabiǵi resýrstar ministrligimen birlesip, 2021-2025 jyldarǵa arnalǵan Geologiialyq barlaý memlekettik baǵdarlamasy ázirlený ústinde. Baǵdarlama sátin salsa 2020 jyly qabyldanady. Aral, Syrdariia, Ertis boiy, Shý-Sarysý, Soltústik Torǵai siiaqty 5 keleshegi mol basseindi zerdeleý úshin memlekettik investitsiia salý kózdeledi. Zertteý dárejesin arttyrý budan ári jer qoinaýyn paidalanýǵa jeke investitsiia tartýǵa múmkindik beredi», - dedi ol.
