Keshe, 6 qazanda Qazaqstanda 2063 adamnyń koronavirýs testi oń kórsetti.
Sársenbi kúni aldyńǵy aptalardaǵydai eń kóp naýqas Almaty qalasynda (423) tirkeldi. Nur-Sultanda 281 adamǵa koronavirýs juqqany testpen dáleldendi. Qalǵan qalalar men oblystarda 200-den az naýqas anyqtaldy.
2020 jyldyń naýryz aiynan beri 898 myń adamnyń koronavirýs testi oń shyqqan. Basym bóligi jazylǵan. 11 422-i qaitys bolǵan. 5 qazanda 33 adam koronavirýstan kóz jumǵan.
5 qazanda 202 adamǵa koronavirýs pnevmoniiasy degen diagnoz qoiylǵan. Pnevmoniianyń koronavirýs uqsas túrin Qazaqstan biligi halyqaralyq uiymdardyń qysymynyń nátijesinde 2020 jyldyń 1 tamyzynan bastap esepke ala bastaǵan. Byltyr Qazaqstanda jazda jii kezdespeitin ókpeniń qabynýy órshigen kezde DDSU "ólim qaýpi joǵary qazaqstandyq pnevmoniia" – durys anyqtalmaǵan Covid dep málimdegen.
Sodan beri resmi málimet boiynsha, 76 myń adam koronavirýs pnevmoniiasyna shaldyqqan. 4881-i qaitys bolǵan. Altaýy 5 qazanda kóz jumǵan.
Densaýlyq saqtaý ministri Aleksei Tsoi sársenbilik brifing kezinde aýrý ósimi ótken aimen salystyrǵanda 2,4 ese tómendegenin málimdedi. Qazir respýblika boiynsha 55 myńǵa jýyq naýqas koronavirýstan emdelip jatyr. 9,5 myń naýqas statsionarda jatyr.
Qazir 6,77 million adam koronavirýsqa qarsy vaktsinanyń tolyq dozasyn alǵan. 1 mln adam ekinshi dozasyn kútip otyr. Ministr Aleksei Tsoi elge batys kompaniialary ázirlegen Pfizer vaktsinasy tórtinshi toqsanda jetkiziledi dep habarlady. Ol negizinen 12 jastan bastap balalar men jasóspirimderge, júkti áielderge salynýy tiis.
Qazir Qazaqstanda reseilik "Spýtnik V" (qazir ony Qaraǵandyda óndiredi), otandyq QazVac, qytailyq Sinopharm kompaniiasynyń BAÁ-de óndirilgen Hayat-Vax pen Qytaida óndirilgen Vero Cell ekpesi, sonymen birge taǵy bir qytailyq Sinovac kompaniiasynyń CoronaVac ekpesi qoldanylady.
Amerikalyq Djons Hopkins ýniversitetiniń málimetinshe, álemde 236 millionnan astam adamǵa koronavirýs juqqan, 4,8 milliony qaitys bolǵan.
