Stýdentter jataqhanasynyń jetispeýshiligi Nur-Sultan jáne Almaty qalalarynda baiqalyp tur. Bul týraly Májilistiń jalpy otyrysynda depýtat Elnur Beisenbaev aitty, dep habarlaidy QazAqparat.
«Elimizdegi jastardyń basym bóligin stýdentter quraidy. Memleket basshysynyń bastamasymen bólinip jatqan granttardyń sany, sondai-aq tegin tehnikalyq bilim berýdiń edáýir kóbeiýi jyldan-jylǵa stýdentterdiń ósýine alyp kelýde. Degenmen, sol jas stýdent úshin jataqhana máselesi sheshimin tabar emes. Ctýdenttiń sapaly bilim alýy úshin, onyń jataqhanamen qamtamasyz etilýiniń mańyzy zor. Elimizde 1,1 millionnan astam stýdent bilim alady. Onyń tek 16 paiyzy ǵana (174 myń) jataqhanamen qamtamasyz etilgen. Qazirdiń ózinde jataqhana jetispeýshiligi 80 myń oryndy qurap otyr. Bul máseleni ýaqytynda sheshý úshin Elbasy 2022 jyldyń sońyna deiin stýdentterge arnap 75 myń oryndyq jańa jataqhana salýdy tapsyrǵan. Biraq, aimaqtarǵa keletin bolsaq, bastama árkelki júzege asýda. Ásirese, ctýdentter jataqhanasynyń eń úlken jetispeýshiligi Nur-Sultan jáne Almaty qalalaryna tiesili», - dedi E. Beisenbaev QR Premer-Ministriniń orynbasary Eraly Toǵjanovtyń atyna joldaǵan depýtattyq saýalynda.
Onyń aitýynsha, Almaty qalasynda 170 myńǵa jýyq (38 ýniversitet, JOO) stýdent bilim alsa, onyń tek 31 myńy ǵana jataqhanamen qamtylǵan. Dál qazirdiń ózinde Almaty qalasy boiynsha jataqhana jetispeýshiligi 35 myń oryndy qurap otyr. Joǵaryda berilgen tapsyrmaǵa sáikes, Almatyda 2022 jyldyń sońyna deiin ýniversitetterde 16 myń oryndyq 38 jataqhana qurylysy aiaqtalýy qajet. Biraq, sońǵy úsh jyldyń ózinde 1600 orynǵa jýyq tek 6 stýdenttik jataqhana boi kóterdi.
«Joǵaryda kóterilgen máselelerge bailanysty, Úkimet tarapynan jataqhana salý boiynsha suraqtardy júieli túrde sheshýdi usynamyz. Birinshiden, stýdenttik jataqhanalardy asa mańyzdy áleýmettik nysan retinde qarastyryp, ákimdikter tarapynan jerdi bólý, sondai-aq qurylysty bastaý úshin qajetti qujattardy retteý boiynsha jumystardy biýrokratizmge ainaldyrmai sheshý joldaryn qarastyrýdy suraimyz. Ekinshiden, elimiz boiynsha eń kóp ýniversitetter ornalasqan Almaty qalasynda seismikalyq talaptarǵa sai 9-10 qabatty jataqhanalar salý máselesin qarastyrý kerek. Úshinshiden, elimizdiń eń iri pedagogikalyq ýniversitetiniń jataqhana salýǵa arnalǵan tiisti jer máselesin sheshý kerek. Tórtinshiden, stýdenttik jataqhanalardyń zamanǵa sai jabdyqtalýy men olardyń kezekti jóndeý jumystaryn ýaqytynda iske asyrýdy qolǵa alýdy suraimyz», - dedi Elnur Beisenbaev.
