Prezidenttiń tapsyrmasy jáne «Nur Otan» partiiasynyń sailaýaldy baǵdarlamasyn iske asyrý sheńberinde elimizdegi joǵary oqý oryndary stýdentteriniń, magistranttary men doktoranttarynyń shákirtaqy kólemi osy jyldyń 1 qyrkúieginen bastap arta tústi.
QR Bilim jáne ǵylym ministrliginiń baspasóz qyzmeti taratqan aqparatqa qaraǵanda, bakalavr baǵdarlamasy boiynsha oqityndardyń shákirtaqysy 20%-ǵa, al magistranttar men doktoranttardyń shákirtaqysy 15%-ǵa ulǵaityldy, dep habarlaidy "Ult aqparat".
«Bakalavrda oqityn stýdentterdiń shákirtaqysy 26 186 teńgeden 31 423 teńgege deiin artty. Pedagogikalyq baǵyt boiynsha oqityn JOO stýdentteri buryn 42 000 teńge alsa, endi 50 400 teńge alatyn bolady. Biz Prezidenttiń tapsyrmasyn oryndap, bolashaq dárigerlerdiń stipendiiasyn edáýir arttyrdyq. Olar 26 186 teńgeniń ornyna 50 400 teńge alatyn bolady. Ótken jyldyń qańtar aiynda Memleket basshysynyń tapsyrmasy boiynsha shákirtaqy 25%-ǵa ulǵaityldy. Shyn máninde, sońǵy eki jylda bakalavriatta oqityn stýdentterdiń stipendiiasy shamamen 2 ese artty», - dedi Bilim jáne ǵylym vitse-ministri Qýanysh Erǵaliev.
Sonymen qatar magistranttar, doktoranttar men internderdiń de shákirtaqylary artty. Eger buryn magistranttar 66 913 teńge alsa, endi olardyń ai saiynǵy stipendiiasy 76 950 teńgeni quraidy. Doktoranttar stipendiiasy 150 000 teńgeden 172 500 teńgege deiin, internderde – 47 431 teńgeden 59 289 teńgege deiin ósti.
Aita keteiik, biyl mundai qoldaý sharalary «Nur Otan» partiiasynyń sailaýaldy baǵdarlamasyn oryndaý jónindegi jol kartasy sheńberinde júzege asyrylyp jatyr.
«Ózgerister men tolyqtyrýlar Úkimet qaýlysymen joǵary oqý oryndarynyń bilim alýshylaryna memlekettik stipendiialardy tóleý, olardyń mólsheri jáne taǵaiyndaý Erejesine engizildi»,-delingen QR BǴM baspasóz qyzmeti taratqan aqparatta.
