Qazaqstanda Sotsialistik Eńbek Eriniń járdemaqysy «Halyq Qaharmany» jáne «Qazaqstannyń Eńbek Eri» ataǵyn ielenýshilerdiń járdemaqysymen teńestirilmek. Bul jaiynda Májilis depýtattarynyń saýalyna berilgen QR Premer-Ministri Asqar Maminniń jaýabynda aitylǵan, dep habarlaidy "Ult aqparat".
«Búgingi kúni Ekinshi dúniejúzilik soǵysqa qatysýshylardyń qataryndaǵy Sotsialistik Eńbek Erleri úshin arnaýy memlekettik járdemaqy 74,65 AEK-ti nemese 197 898 teńgeni, «Eńbek dańqy» ordeniniń 3 dárejesine ie Sotsialistik Eńbek Erleriniń járdemaqysy 9,60 AEK-ti nemese 25 450 teńgeni (2020 jyly) quraidy. Sotsialistik Eńbek Erlerine belgilengen járdemaqyny qaita qarastyrý usynysy ózekti ekendigi sózsiz. Osyǵan orai Úkimet «Qazaqstan Respýblikasynyń áleýmettik qamtamasyz etý máseleleri boiynsha keibir zańnamalyq aktilerine ózgertýler men tolyqtyrýlar engizý týraly» QR zańynyń jobasyn ázirleýge bastama jasady. Onyń aiasynda Sotsialistik Eńbek Erleri men «Eńbek dańqy» ordeni iegerleriniń qyzmetteri men jankeshti eńbekterin moiyndaý maqsatynda olarǵa beriletin arnaýly memlekettik járdemaqy kólemin «Halyq Qaharmany» men «Qazaqstannyń Eńbek Eri» ataǵyn ielengenderge beriletin 138,63 AEK-ke nemese 367 508 teńgege (2020 jyly) deiin arttyrý sharalary qarastyrylǵan», - dep atap ótedi Úkimet basshysy.
Onyń aitýynsha, qazirgi ýaqytta zań jobasynyń tujyrymdamasy ázirlenip, zań jobalaý qyzmeti máseleleri jónindegi vedomstvoaralyq komissiia tarapynan maquldanǵan. Respýblikalyq biýdjettik komissiia da memlekettik biýdjetten qosymsha shyǵystarǵa qoldaý bildirip otyr.
«Atalǵan zań jobasy belgilengen tártippen memlekettik organdarda kelisim protsedýrasynan ótip jatyr jáne QR Úkimetiniń 2020 jylǵa arnalǵan zań jobalaý jumysy josparyna sáikes, osy jyldyń sáýirinde QR Parlamenti qaraýyna engizý kózdelgen», - dedi Asqar Mamin.
