Qazaqstan Chernobyl AES-indegi apattyń zardaptaryn joiýǵa qatysýshylarǵa járdemaqy mólsheri artady. Bul týraly Parlament Májilisiniń jalpy otyrysynda QR Eńbek jáne halyqty áleýmettik qorǵaý ministri Birjan Nurymbetov málim etti, dep habarlaidy QazAqparat.
Búgin jalpy otyrysta «Qazaqstan Respýblikasynyń keibir zańnamalyq aktilerine áleýmettik qamsyzdandyrý máseleleri boiynsha ózgerister men tolyqtyrýlar engizý týraly» zań jobasy birinshi oqylymda qaralyp, maquldandy.
«Arnaýly memlekettik járdemaqy týraly» Zańǵa engiziletin ózerister basqa memleketterdiń aýmaǵynda urys qimyldaryna qatysqan áskeri qyzmetshilerge arnaýly memlekettik járdemaqy belgileýdi, sondai-aq zańnamalyq aktide qarastyrylǵan jekelegen sanattaǵy azamattarǵa járdemaqy mólsherin arttyrýdy kózdeidi. Bul járdemaqyǵa bailanysty ózgerister sińirgen jáne janqiiarlyq eńbekterin moiyndaý maqsatynda Sotsialistik Eńbek Erlerine, úsh dárejeli Eńbek Dańqy ordeniniń iegerlerine, sondai-aq beibitshilik pen qaýipsizdikti qamtamasyz etý úshin qosqan úlken úlesteri úshin 1988-1989 jyldary Chernobyl AES-indegi apattyń zardaptaryn joiýǵa qatysýshylarǵa qatysty», - dedi ministr.
Onyń sózine qaraǵanda, búginde qoldanystaǵy zańnamaǵa sáikes memleketten jeńildikter men kepildikter alatyn ardagerlerimizdiń sany 169 myń bolsa, qosymsha kózdelip otyrǵan ardagerlermen birge memlekettik qoldaý sharalarymen 180 myńnan astam ardager qamtylatyn bolady.
Ministrliktiń málimetinshe, 1988-1989 jyldary Chernobyl AES-indegi apattyń zardaptaryn joiýǵa qatysqan adamdarǵa arnaýly memlekettik járdemaqy mólsherin 2,13 AEK-ten (2020 jyly-5 647 teńge) 4,8 AEK-ke deiin (2020 jyly-12 725 teńge) arttyrý usynylady.
Budan basqa, áleýmettik ádilettilik qaǵidatyn qamtamasyz etý maqsatynda Sotsialistik Eńbek Erleri úshin beriletin arnaiy memlekettik járdemaqylardyń mólsherin qaita qaraý usynyldy.
2019 jyldaǵy 1 qańtarynan bastap «Qazaqstannyń Eńbek Eri» ataǵyna ie bolǵan adamdar úshin 138,63 ailyq eseptik kórsetkish mólsherinde arnaiy memlekettik járdemaqy engizildi (2019 jyly – 350041 teńge). Bul «Qazaqstannyń Eńbek Eri» ataǵyn alǵan adamdarda jáne ótken jyldary eldiń damýyna eleýli úles qosqan Sotsialistik Eńbek Erlerine járdemaqy mólsherindegi edáýir aiyrmashylyqtarǵa alyp keldi. Osyǵan bailanysty Ekinshi dúniejúzilik soqysǵa qatysýshylar qatarynan Sotsialistik Eńbek Erleri, sondai-aq Sotsialistik Eńbek Erleri úshin járdemaqy mólsherin 74,65 jáne 9,6 AEK – ten 138,63 AEK-ke deiin (2020 jyly-367 508 teńge) arttyrý usynyldy.
Budan buryn habarlanǵandai, búgin Parlament Májilisiniń jalpy otyrysynda «Ardagerler týraly» zań jobasy birinshi oqylymda maquldandy.
