Elordada «Shaǵala» atty pilotsyz aviatsiialyq-barlaý kesheni synaqtan ótkizildi. Ushqyshsyz ushý apparatty QR Tuńǵysh Prezidenti – Elbasy atyndaǵy Ulttyq qorǵanys ýniversitetiniń áskeri ǵalymdary jasaǵan, dep habarlaidy QazAqparat.
QR Qorǵanys ministrliginen málim etkendei, qazirgi zamanǵy áskeri qaqtyǵystarda ushqyshsyz ushý apparattaryn qoldaný, otandyq osyndai qurylǵyny jasaý qajettigin kórsetti. Ulttyq qorǵanys ýniversitetinde qarsylastyń brondy tehnikasy men kúshine qarsy tiimdi qarý retinde tek barlaý drondaryn ǵana emes, sonymen qatar soqqy berýshi ushqyshsyz ushý apparatyn qoldanýǵa da taldaý jasaldy.
«Shaǵala» barlaýshy ushqyshsyz ushý apparatynyń tájiribedegi nusqasy baǵdarlamalyq-apparattyq bailanys arnasymen, bailanys arnasy qorǵalǵan jeke kriptografiialyq hattamamen jabdyqtalǵan.
«Ushqyshsyz ushý apparaty aýqymynda áskerlerdi otandyq ázirlemelermen qamtamasyz etýge degen umtylys qýantady. Degenmen, bul osyndai sheteldik qurylǵylarmen birdei bolmaýy kerek. Otandyq apparattardyń taktikalyq-tehnikalyq sipattamalaryn ázirleý kezinde qazaqstandyq armiianyń barlyq qajettilikterin, bizdiń qorǵanys maqsatyndaǵy geografiialyq erekshelikterdi eskerý qajet», - dep atap ótti QR Qorǵanys ministriniń orynbasary general-leitenant Timýr Dándibaev.
Zertteýge arnalǵan úlgini poligonda synaqtan ótkizý kezinde áskeri ǵalymdar tómen temperatýraǵa tózimdi qýat kóziniń jańa ónimin synaqtan ótkizdi. Erekshe akkýmýliator batareialary – Ulttyq qorǵanys ýniversiteti mamandarynyń oilap tapqandary.
Qorǵanys ministriniń orynbasary qazaqstandyq ushqyshsyz ushý apparattarynyń óndirisi Qazaqstanda jasalmaityn toraptar men agregattardyń importyn barynsha azaita otyryp, otandyq qorǵanys ónerkásibiniń múmkindikterin tereń integratsiialaýdy kózdeitinine nazar aýdardy.
«Shaǵala» apparatyn shyǵarý úshin otandyq qorǵanys-ónerkásip kesheniniń múmkindikterin eskere otyryp, qyzmet kórsetý, tehnikter men operatorlardy oqytý baǵdarlamalary, sondai-aq Qarýly Kúshterdiń oqý oryndary men bólimderinde ony engizý úshin ushqyshsyz ushý apparaty operatorlarynyń jaýyngerlik daiarlyq kýrsy ázirlendi.
Áskeri ǵylymi-zertteý ortalyǵynyń bastyǵy polkovnik Qýandyq Aqsholaqovtyń aitýynsha «Shaǵala» ushqyshsyz ushý apparaty, osyǵan uqsas sheteldik apparattardyń tehnikalyq sipattamalarynan kem túspeidi, kerisinshe ózindik artyqshylyqtarǵa ie.
«Ushqyshsyz ushý apparatynyń ushý qashyqtyǵy 30 shaqyrymǵa deiingi aralyqty quraidy. Aýada ol eki jarym saǵatqa deiin bolady, jeldiń ekpini sekýndyna 14 metrge deiin kúsheigen kezde, aýada ózin turaqty ustaidy. Bolashaqta biz ony vzvodtan batalonǵa deiingi býyndaǵy áskerlerdiń qarý-jaraq qataryna qosýdy josparlap otyrmyz», - dedi áskeri ǵylymi-zertteý ortalyǵynyń bastyǵy polkovnik Qýandyq Aqsholaqov.
Synaq retindegi ushýlar baǵdarlamasynda «Shaǵala» ushqyshsyz ushý apparatyn daiyndaýdyń ártúrli kezeńderi men jumys rejimderi usynyldy.
Ǵylymi jumystyń nátijeleri patenttelgen jáne de tájiribe aiaqtalǵannan keiin barlyq atqarylǵan jumystar Qazaqstannyń qorǵanys-ónerkásibi keshenine beriletin bolady.
