Foto: Pexels.com
Biyldan bastap 29 qazan resmi túrde kásibi mereke — Qazaqstan kásipkerleri kúni bolyp belgilendi. Eńbek jáne halyqty áleýmettik qorǵaý ministrliginiń tiisti buiryǵyna 2025 jylǵy 30 shildede qol qoiyldy, dep habarlaidy Ult.kz.
Bul kúndi tańdaý mańyzdy tarihi oqiǵaǵa bailanysty. 2015 jylǵy 29 qazanda biznesti qoldaý jónindegi biryńǵai memlekettik saiasattyń bazalyq qaǵidattaryn qalyptastyra otyryp, kásipkerlik, investitsiia, básekelestik jáne memlekettik baqylaý salasyndaǵy negizgi zańnamalyq aktilerdi shoǵyrlandyrǵan Qazaqstan Respýblikasynyń Kásipkerlik kodeksi qabyldandy.
Búginde elimizde 2 million 300 myńnan asa biznes sýbektisi tirkelgen.
Kásipkerlerdi qoldaý ekonomikalyq saiasattyń basymdyǵynyń biri bolyp qala beredi. Jyl basynan beri 288 milliard teńgege 2 myńnan astam joba sýbsidiialanyp, 61 milliardqa 737 jobaǵa kepildik berildi. Toǵyz myńǵa jýyq kásipker oqytyldy.
2025 jyly ShOB-ty qoldaýǵa 270 milliard teńgeden astam qarajat bólý josparlanýda. 12,6% mólsherlememen "Órleý" jeńildikpen kreditteý baǵdarlamasy da iske qosyldy. Qoldaýdyń jalpy kólemi 750 milliard teńge. Onyń ishinde 300 milliardy - "Damý" qarajaty, 450 milliardy - bank resýrsy. Qazirdiń ózinde 200 milliard teńgege 400-ge jýyq joba qarjylandyryldy.
Biznestiń habardarlyǵyn arttyrý maqsatynda "Biznestiń tsifrlyq kartasy"jobasy iske asyrylýda. 100-den astam qoldaý sharasy bar tizilim bekitildi. "EGov Business" qosymshasymen "Báiterek" holdingin qoldaý sharalaryn qamtityn "Bgov" AJ integratsiiasy aiaqtalyp, ony 71 myń paidalanýshy 2,3 mln ret paidalandy.
