Qazaqstanda Pensilvaniia memlekettik ýniversitetiniń filialy ashylýy múmkin. Bul týraly Ǵylym jáne joǵary bilim ministri Saiasat Nurbek jazdy, dep habarlaidy "Ult aqparat".
"AQSh-qa jumys sapary barysynda birqatar nátijeli kezdesý ótkizdim. Amerikalyq joǵary oqý oryndarynyń basshylarymen eki jaqty kelisimder jasadyq.
Bizdiń ministrliktiń basty maqsattarynyń biri - álemdik standarttar boiynsha kadr daiarlaý ekeni barshańyzǵa belgili. Ol úshin oqý protsesin barynsha tájiribege baǵdarlaý jáne álemniń jetekshi joǵary oqý oryndarynyń akademiialyq modelin qoldaný qajet.
Amerikalyq ýniversitetter barlyq álemdik reitingte laiyqty kósh bastap keledi. Mysaly, bir ǵana Times Higher Education reitinginde TOP-10 joǵary oqý ornynyń 7-eýi — AQSh ýniversitetteri" - dedi ministr.
Ol búgin Pensilvaniia memlekettik ýniversitetiniń top-menedjmentimen mańyzdy kezdesý ótkizgenin, naqtyraq, PennState vitse-prezidenti (Provost) Justin Schwartz-pen, vitse-provost Roger Brindley-men, Pensilvaniia memlekettik ýniversitetiniń IT, zań mektebiniń dekandarymen júzdeskenin aitty.
"Pensilvaniia memlekettik ýniversitetiniń ókilderimen buǵan deiin de kezdesken edik. Onyń nátijesinde atalǵan oqý orny qazaqstandyq stýdentter men elimizdiń ǵalymdary úshin granttar túrinde 1 mlrd teńge nemese 2 mln dollar kólemindegi tikelei investitsiia bólgen bolatyn. Bul joba qazir iske asyrylyp jatyr.
Pensilvaniia memlekettik ýniversiteti uzaq jyldardan beri bizdiń elimizdiń seriktesi bolyp keledi. «Bolashaq» baǵdarlamasy bastalǵan sátten bastap, barlyq amerikalyq joǵary oqý oryndary arasynda osy ýniversitet Qazaqstannan barynsha kóp stýdent qabyldady. Osy ýaqytqa deiin 162 qazaqstandyq atalǵan oqý ornyn bitirdi.
Búgingi kezdesýde biz Qazaqstanda Pensilvaniia memlekettik ýniversitetiniń filialyn ashý boiynsha naqty qadamdardy talqyladyq. Amerikalyq joǵary oqý ornynyń basshylyǵy bul bastamaǵa qoldaý kórsetti. Qazirdiń ózinde máseleni tiisti pysyqtaý jumystary bastaldy" - dep jazdy Saiasat Nurbek.
Ministrdiń sózinshe, resmi kezdesýlerden keiin ol Pensilvaniia memlekettik ýniversitetinde oqityn qazaqstandyqtarmen jolyqqan.
"Jastar shetelde oqýdan alǵan óz áserlerimen bólisti. Stýdentterge Qazaqstanda joǵary bilim jáne ǵylym salasynda júrgizilip jatqan reformalar týraly áńgimeledim. Jas zertteýshiler men ǵalymdardy qoldaý boiynsha memleket qolǵa alyp otyrǵan sharalardy erekshe atap óttim" - dep túiindedi ol.
