Qazaqstanda otbasynyń tsifrlyq kartasy ázirlenip jatyr. Bul týraly QR Eńbek jáne halyqty áleýmettik qorǵaý vitse-ministri Erbol Ospanov aitty, dep habarlaidy QazAqparat.
«Sondai-aq, biz otbasynyń tsifrlyq kartasyn jasaý boiynsha jumys istep jatyrmyz. Joba qiyn ómirlik jaǵdaidaǵy otbasylardy avtomatty túrde anyqtaýǵa baǵyttalǵan. Derekter bilim berý, ekonomikalyq jaǵdailar, densaýlyq, sondai-aq turǵyn úi jáne áleýmettik ahýal siiaqty túrli baǵyttar boiynsha memlekettik organdardyń integratsiialanǵan júieleri negizinde qalyptastyrylatyn bolady. Bul azamattardyń memlekettik mekemelerge júginýin kútpei-aq, túrli salalardan belsendi túrde keshendi qoldaý sharalaryn kórsetýge, sondai-aq qoljetimdi indikatorlar arqyly otbasynyń áleýmettik jaǵdaiynyń nasharlaýyna boljam jasaýǵa múmkindik beredi», – dedi Erbol Ospanov ortalyq kommýnikatsiialar qyzmetindegi baspasóz máslihatynda.
Vitse-ministr sondai-aq elektrondy eńbek birjasy portalynyń jumysyn jetildirý týraly aitty. Bul resýrs 2018 jyly iske qosyldy jáne jumys berýshilerden, memlekettik jumyspen qamtý ortalyqtarynan jáne jeke jumyspen qamtý agenttikterinen, onlain-alańdardan túsetin bos jumys oryndaryn, sondai-aq jeke tulǵalardyń túiindemelerin jinaqtaidy.
«2020 jyly elektrondy eńbek birjasy arqyly 532 myńnan astam adam jumysqa ornalastyryldy. Onyń ishinde 319 myńy turaqty jumys oryndaryna jáne 213 myńy ýaqytsha jumysqa kirdi. Jyl basynan beri elektrondy eńbek birjasy kómegimen 101 myń adam jumys tapty», – dedi ol.
