Senat ólim jazasyn joiý týraly zańdy qabyldady, dep habarlaidy Sputnik Qazaqstan.
Bas prokýrordyń orynbasary Áset Shyndalievtiń aitýynsha, Qazaqstan Qylmystyq kodeksiniń 11-babynan ólim jazasy alynyp tastalady. Budan bólek, ólim jazasy túsinigi, ony qoldaný sharty, moratorii kezindegi talaptar týraly arnaiy bap ta kúshin joiady.
"Endi eń qatań jaza ómir boiyna bas bostandyǵynan aiyrý bolady. Al ólim jazasy almastyrylǵandardy merziminen buryn shartty túrde bosatýǵa tyiym salynady. Osylaisha Qazaqstan ólim jazasynan tolyǵymen bas tartady", - dedi Shyndaliev senattyń jalpy otyrysynda.
Al halyqaralyq hattama boiynsha ólim jazasyn alyp tastaǵannan keiin ony qaita qalpyna keltirýge bolmaidy.
"Zań jobasyn qabyldaý arqyly Qazaqstan azamattyq jáne saiasi quqyqtar týraly halyqaralyq paktini nyq saqtaityn memleket ekenin kórsetedi. Sonymen qatar elimiz ólim jazasynan bas tartqan 106 memlekettiń qataryna kiredi", - dep atap ótti Shyndaliev.
Senat depýtattary zańdy biraýyzdan qabyldap, prezidenttiń qol qoiýyna jiberdi.
Aita keteri, prezident Qasym-Jomart Toqaev ólim jazasyna qatysty qylmystyq zańnama normalaryn halyqaralyq hattamamen úilestirýdi tapsyrǵan bolatyn. Al ulttyq qoǵamdyq senim keńesiniń otyrysynda ólim jazasyn tolyǵymen alyp tastaý qajettigin aitty.
