QR Premer-Ministri Álihan Smaiylov Ekonomikany demonopolizatsiialaý jónindegi komissiianyń kezekti otyrysyn ótkizdi, onda Básekelestikti qorǵaý jáne damytý agenttiginiń basty taýar naryqtaryn reformalaý jónindegi usynystary qaraldy, dep habarlaidy "Ult aqparat" primeminister.kz saityna silteme jasap.
Atap aitqanda, munai naryǵyndaǵy qatysýshylar sanyn arttyrý, sondai-aq jalpy, munai jáne munai ónimderi naryǵyndaǵy jaǵdaidy jaqsartý úshin MÓZ munaidy jer qoinaýyn paidalanýshylardan tikelei satyp alý, munaidyń birjalyq saýda-sattyǵyn engizý, munai ónimderin satý kólemin ulǵaitý jáne t.b. usynyldy.
Al taýarlyq gaz naryǵyn reformalaý boiynsha birjalyq saýda-sattyqty engizý jáne jer qoinaýyn paidalanýshylardyń taýarlyq gazǵa qol jetkizý erejelerin qabyldaý usynyldy, bul jabdyqtaýshy uiymdarǵa ony tikelei jáne básekelestik negizde alýǵa múmkindik beredi.
Álihan Smaiylov Energetika ministrligine jáne múddeli memlekettik organdarǵa bul tásilderdi el ekonomikasyna áser etý turǵysynan qosymsha taldaýdy tapsyrdy.
Sondai-aq otyrysta azamattyq aviatsiia, qoǵamdyq kólik jáne qarjylyq qyzmetter naryqtaryn demonopolizatsiialaý jónindegi sharalar qaraldy. Jalpy, Úkimet basshysy aviaotynmen birjalyq saýda-sattyq úlesin 10-nan 20%-ǵa deiin arttyrý, áýejailarda Ashyq aspan rejimin qoldaný merzimin 3-ten 5 jylǵa deiin ulǵaitý, el ishindegi bankter arasynda klientterdiń aǵymdaǵy shottaryn aýdarý júiesin jáne ashyq banktik baǵdarlamalyq interfeister standarttaryn (Open Banking i Open API) engizý jónindegi usynystardy qoldady.
Sonymen qatar otyrys barysynda elektr energiiasy, temirjol júk jáne jolaýshylar tasymaly naryqtaryn demonopolizatsiialaý jóninde usynystar aityldy.
