QR Premer-Ministriniń orynbasary Eraly Toǵjanovtyń tóraǵalyǵymen áleýmettik áriptestik pen áleýmettik jáne eńbek qatynastaryn retteý jónindegi respýblikalyq úshjaqty komissiianyń otyrysy ótti, dep habarlaidy "Ult aqparat" primeminister.kz-ge silteme jasap.
Otyrysqa Qazaqstan Kásipodaqtar federatsiiasy men jumys berýshiler birlestikteriniń ókilderi, sondai-aq ortalyq jáne jergilikti memlekettik organdardyń basshylary qatysty.
Eńbek jáne halyqty áleýmettik qorǵaý ministri men óńir ákimderiniń orynbasarlary osy baǵyttaǵy atqarylyp jatqan sharalar boiynsha esep berdi.
Otyrys barysynda vitse-premer pandemiia kezinde eń aldymen jumys oryndarynyń saqtalýy, jalaqynyń ýaqytyly tólenýin qamtamasyz etý máselelerine basymdyq berilip otyrǵanyn atap ótti. Osy oraida Eraly Toǵjanov jumys berýshiler men qyzmetkerlerdiń múddelerin qorǵaityn kásipodaqtardyń baǵa jetpes úlesin atap ótti.
Qorytyndylai kele E. Toǵjanov ortalyq memlekettik jáne jergilikti atqarýshy organdarǵa birqatar tapsyrma berdi, atap aitsaq:
shtattardy jáne eńbekaqy tóleý sharttaryn ońtailandyrý boiynsha Qazaqstannyń jumys berýshileri iske asyratyn sharalarǵa keshendi taldaý jasaý; eńbekaqy tóleýdiń biryńǵai standarttaryn engizý máselesin pysyqtaý; salalyq úshjaqty komissiialardyń jumysyn jandandyrý.
Budan bólek, otyrys aiasynda Qazaqstan Úkimeti, jumys berýshilerdiń respýblikalyq birlestikteri men kásipodaqtardyń respýblikalyq birlestikteri arasynda 2021-2023 jyldarǵa arnalǵan bas kelisimge qol qoiyldy. Jańa kelisimde qoiylǵan mindetter qyzmetkerlerdiń jumys isteýine qolaily jaǵdai jasap, qaýipsizdigin qamtamasyz etýdi kózdeidi.
