Byltyrdan bastap qazaqstandyqtar úshin qujatty jetkizý qyzmeti qoljetimdi edi, endi onyń aiasy keńeie túspek. Ol týraly «Azamattarǵa arnalǵan úkimet» memlekettik korporatsiiasynyń basqarma tóraǵasy Súienish Ábdildin aityp berdi, dep habarlaidy QazAqparat.
«Biz «TsON» atty mobildi qosymsha ázirledik. Qosymshany AppStore jáne PlayMarket platformalarynan júkteýge bolady. Ol jerde azamattarǵa 13 memlekettik qyzmet túri qoljetimdi. Ol úshin HQO operatorymen beinebailanys ornatsa bolǵany. Jii qoldanatyn qyzmetterdiń qatarynda qaita kýálik berý, turǵylyqty mekenjai boiynsha tirkeý jáne tehnikalyq tólqujattyń kóshirmesin jasatý bar. Sol siiaqty atalǵan mobildi qosymshanyń kómegimen jaqyn mańdaǵy HQO-ny taýyp, aldyn ala kezekke turýǵa bolady», - dedi Súienish Ábdildin OKQ-te ótken brifingte.
Onyń aitýynsha, búginde «TsON» atty mobildi qosymshany 32 myńnan astam qazaqstandyq qoldanyp jatyr.
Sondai-aq, spiker brifing barysynda daiyn qujattardy jetkizý qyzmeti týraly aityp berdi.
«Ótken jyldan bastap biz daiyn qujattardy jetkizý qyzmetin iske qostyq. Búginde atalǵan qyzmet elimizdiń 16 qalasynda qoljetimdi. 2021 jyldyń 1 sáýirinen bastap osy kúnge deiin 6 myńnan astam qujat klientterdiń úiine jetkizildi. Ony qoldaný ádisi ońai. Qujat daiyn bolǵanda klienttiń telefon nómirine SMS habarlama keledi. Habarlamadaǵy silteme arqyly ótip, 970 teńge tóleýińiz kerek. Tólem qabyldanǵan soń qujat sol kúni sizge jetkiziledi. Qazirgi ýaqytta bul qyzmet túrin jetildirý jaǵyn qarastyryp jatyrmyz. Iaǵni qujatty basqa da platformalar arqyly jetkizý. Mysaly, Yandex arqyly jetkizý múmkindigi», - deidi ol.
