Qazaqstanda koronavirýsty jeńil formada ótkeretin naýqastar sany artyp keledi. Bul týraly QR Densaýlyq saqtaý ministriniń zerthanalyq qyzmet boiynsha keńesshisi Janar Súleimenova aityp berdi, dep habarlaidy QazAqparat.
Onyń aitýynsha, KVI jeńil formasy men simptomsyz túri kóbirek tirkelip jatyr.
«Bul aýrý qurylymynyń genetikalyq túrlenýi júrip jatqanyn kórsetedi. Biz baiqaǵan pnevmoniianyń aýyr túrleri mundai kóp kólemde tirkelip jatqan joq», - dedi ministr keńesshisi Ortalyq kommýnikatsiialar qyzmetinde ótken onlain brifingte.
Buǵan deiin QR DSM Qoǵamdyq densaýlyq saqtaý ulttyq ortalyǵy Juqpaly aýrýlardyń aldyn alý departamentiniń direktory Jumabek Bekenov Qazaqstanda simptomdy jáne simptomsyz naýqastar sany 27 myńnan asqanyn málimdedi.
«Qazirgi tańda Qazaqstan Respýblikasynda 27 541 COVID-19 jaǵdaiy tirkelip otyr. Onyń simptomsyz túri – 9 809 adamda, simptomdy túri – 17 732 adamda. Sońǵy táýlikte 1 471 aýrý tirkeldi, onyń 507 – simptommen, 964-i – simptomsyz», - dedi J. Bekenov.
