30 tamyz kúni Qazaqstanda 134 Covid ólimi tirkeldi. Bul týraly Densaýlyq saqtaý ministrligi habarlady.
Qaitys bolǵandar arasynda 98 adamnyń Covid juqtyrǵany PTR testimen rastalǵan (KVI+). Qalǵan 36 adamda PTR teris nátije kórsetken, olardyń diagnozy aýrý belgileri boiynsha qoiylǵan (KVI-). Sońǵysyn "kovidtektes pnevmoniia" dep atap júr.
KVI+ boiynsha, Almatyda 28 adam, Shymkentte 18 adam kóz jumǵan. KVI- boiynsha, kósh basynda Jambyl oblysy tur. Onda "kovidtektes pnevmoniiaǵa" shaldyqqan 10 kisi qaitys bolǵan.
Qazaqstanda shildeniń sońynan beri koronavirýstan kún saiyn júzden astam adam qaitys bolyp jatyr. Densaýlyq saqtaý ministrligi aýrýdyń bulai ýshyǵýyn alǵash ret Úndistanda anyqtalǵan "delta" variantynyń taraýymen bailanystyrady.
Bul variant Qazaqstanda maýsymnyń sońynda tirkelgen. Juqpalyǵy men qaýpi joǵary bul variant kelgeli naýqastar sany kúrt artty. 27 shilde men 21 tamyz aralyǵynda kún saiyn 7-8 myń naýqas tirkelip júrdi.
Shildeniń basynda úkimet qyzmet kórsetý salasynda jumys isteitinderdi vaktsina saldyrýǵa mindettedi. Olar ekpeniń birinshi dozasyn 10 tamyzǵa deiin, ekinshisin 1 qyrkúiekke deiin alýy kerek boldy. Vaktsina saldyrǵysy kelmegender, apta saiyn teris nátijeli PTR anyqtamasyn ótkizýi májbúr.
Densaýlyq saqtaý ministrliginiń málimetinshe, 19 million halqy bar Qazaqstanda 5,4 millionnan astam adam vaktsinany tolyq alǵan. Budan bólek, 1,2 millionnan astam adam ekpeniń ekinshi dozasyn kútip otyr.
Keiingi kúnderi Covid naýqastary boiynsha táýlik kórsetkishi tómendei bastaǵany baiqalady. Máselen, 31 tamyz kúni koronavirýs bar bolǵany 4320 adamnyń analizinen anyqtalǵan.
Indet bastalǵaly elde barlyǵy 794 myńǵa jýyq adamnyń Covid juqtyrǵany PTR testimen rastalǵan. Onyń 9402-si aýrýdan aiyǵa almai, qaitys bolǵan. Biraq bilik bul statistikaǵa koronavirýs juqtyrǵany rastalǵan, biraq "ózge aýrýdan qaitys boldy" degen 2633 adamdy qospai otyr.
Úkimet "kovidtektes pnevmoniia" esebin júrgizýdi byltyr 1 tamyzda bastaǵan. Sodan beri pnevmoniianyń bul túri 69 790 adamnan anyqtalǵan, onyń 4464-i qaitys bolǵan.
1 qyrkúiektegi málimet boiynsha, elde 110 420 adam koronavirýs infektsiiasynan (–103 553+ jáne 6 867 KVI-) emdelip jatyr.
Olardyń ishinde 23 744 patsient statsionarda, 86 676 naýqas ambýlatoriialyq deńgeide em qabyldaýda.
KVI+, KVI- shaldyqqandardyń arasynda:
• 1 704 adamnyń jaǵdaiy aýyr,
• 493 patsienttiń jaǵdaiy óte aýyr,
241 naýqas ÓJJ apparatynda jatyr.
Sondai-aq, búginge deiin Qazaqstanda koronavirýs infektsiiasyna qarsy vaktsinanyń 1-shi komponentin - 6 669 969, 2-shi komponentin 5 438 316 adam saldyrǵan.
