Qazaqstanda koronavirýsty taǵy 4866 adam juqtyrdy jáne buǵan deiin aýrýǵa shaldyqqan 101 adam qaitys boldy. Bul týraly densaýlyq saqtaý ministrligi habarlady.
Maýsymnyń sońynda elde juqpalyǵy men aýyr halge túsirý jyldamdyǵy joǵary "delta" varianty tirkelip, kúndelikti naýqas sany kúrt artty. Shildeniń sońynan tamyzdyń ortasyna deiin kúnine arasynda 8 myńnan astam naýqas anyqtalyp júrdi. Kisi ólimi de artty. Birneshe kúnde táýligine 150-den astam adam qaitys boldy, al 18 tamyz kúni 163 kisiniń ólimi tirkelip, rekord ornady.
Biraq tamyzdyń sońynan bastap indettiń beti qaita bastaǵany baiqaldy. Kúndelik tirkeletin naýqastar sany birtindep azaiyp, bes myńnan tómendedi. Kisi ólimi de aýrý ýshyǵa bastaǵan shildeniń sońyndaǵy deńgeige deiin tómendedi.
Eldiń epidemiialyq kartasynda "qyzyl aimaqtan" shyǵyp jatqan óńirler sany artty. 3 qyrkúiek kúni "sary aimaqta" Shyǵys Qazaqstan, Jambyl jáne Soltústik Qazaqstan oblystary bolsa, 4 qyrkúiek kúni olardyń qataryna Qyzylorda oblysy qosyldy. Indettiń sharyqtaý sheginde "qyzyl aimaqta" bolǵan Túrkistan oblysy qazir "jasyl aimaqta".
Degenmen indet densaýlyq júiesine áli de salmaq túsirip tur. Densaýlyq saqtaý ministrliginiń málimetinshe, qazir elde koronavirýstan barlyǵy 94 myńnan astam adam emdelip jatyr. Onyń 20,7 myńy emdi statsionarda alyp jatyr. 420 naýqastyń jaǵdaiy óte aýyr, 220 adam ókpeni jeldetý apparatyna qosylǵan.
Indet bastalǵaly elde 812 999 adamnyń analizinen koronavirýs anyqtalǵan. Olardyń arasynda 9779 adam qaitys bolǵan. Bilik bul esepke koronavirýs juqtyrǵany rastalǵan, biraq "ózge aýrýdan qaitys boldy" degen 2633 adamdy qospai otyr.
Sonymen qatar Qazaqstan úkimeti byltyr 1 tamyzdan bastap koronavirýs juqtyrǵany PTR testimen rastalmaǵan, biraq aýrý belgileri soǵan uqsaityn "kovidtekstes pnevmoniia" naýqastarynyń esebin júrgize bastady. Osy kúnge deiin pnevmoniianyń bul túrimen 71 225 adam tirkeldi. Onyń 4553-i qaitys bolǵan.
19 million halqy bar Qazaqstanda úkimet 10 million adamǵa vaktsina salýdy kózdep otyr. Vaktsinalaý naýqanyn 1 aqpanda bastaǵan bul elde osy kúnge deiin barlyǵy 5,6 million adam ǵana ekpeni tolyq alǵan. Budan bólek, 1 million 172 myń adam birinshi dozany alyp, ekinshisin kútip otyr.
