8 tamyzda Qazaqstanda 7 671 adamnyń analizinen koronavirýs anyqtaldy.
Jeksenbi kúni eń kóp naýqas Almatyda (1503) tirkeldi. Nur-Sultanda – 1452, Qaraǵandyda – 1058, Shymkentte 565 adamnyń koronavirýs testi oń kórsetken. Atyraý oblysynda – 416, Aqtóbe oblysynda 393 adam koronavirýs aýrýyna shaldyqqan. Qalǵan oblystarda tirkelgen naýqastar 300-ge jetpeidi.
Qazir Túrkistan oblysy koronavirýstyń taraýy boiynsha "sary aimaqta" tur. Qalǵan qalalar men oblystar "qyzyl aimaqta".
Densaýlyq saqtaý ministrliginiń málimetinshe, 7 tamyzda 76 adamǵa koronavirýs pnevmoniiasy diagnozy qoiylǵan. Sol kúni 140 adam ólimi tirkelgen.
Ótken aptada densaýlyq saqtaý salasynyń mamandary adam óliminiń kóp bolý sebebin koronavirýstyń delta variantynyń jyldam taraýymen bailanystyrǵan. Dárigerlerdiń aitýynsha, delta "aǵza tańdamaidy, ol jyldam asqynady, sozylmaly aýrýdyń joqtyǵy aýrýdyń asqynbaýyna kepildik bola almaidy".
Indet bastalǵaly beri 641 myń adamnyń koronavirýs testi oń shyqqan. 6876-sy qaitys bolǵan. 2020 jyldyń tamyz aiynan beri 63 myń adam koronavirýs pnevmoniiasyna shaldyqqan. 3915-i qaitys bolǵan.
Qazaqstan koronavirýs juqtyrǵandar men odan qaitys bolǵandar jóninen Ortalyq Aziiada birinshi orynda tur. Postsovettik keńistikte onyń aldynda Resei (6,3 mln) men Ýkraina (2,3 mln) ǵana bar.
Djons Hopkins ýniversitetiniń málimetinshe, Qazaqstanda indet bastalǵaly beri keminde 697 580 adam koronavirýsqa shaldyqqan. Zertteý institýty koronavirýs pen koronavirýs pnevmoniiasyna shaldyqqandardy birge esepteidi. Qazaqstan biligi koronavirýs statistikasyna koronavirýs pnevmoniiasyn qosýdan bas tartqan.
9 tamyzdaǵy derek boiynsha, qazir el óńirlerinde 113 186 adam koronavirýs infektsiiasynan (–109 382 + jáne 3 804 KVI-) em qabyldaýda. Olardyń ishinde 31 504 patsient statsionarda, 81 682 naýqas ambýlatoriialyq deńgeide emdelip jatyr.
KVI+, KVI- shaldyqqandardyń arasynda:
- 1 981 adamnyń jaǵdaiy aýyr,
- 402 patsienttiń jaǵdaiy óte aýyr,
- 192 naýqas ókpeni jasandy jeldetý apparatyna qosylǵan.
Aqpan aiynan beri 4,3 mln-nan astam adamǵa koronavirýsqa qarsy vaktsinanyń eki dozasy salynǵan. Al 5,7 mln adam vaktsinanyń alǵashqy dozasyn qabyldaǵan.
